郑启泰猝逝｜胞妹吁勿胡乱猜测死因 未婚妻延续Eric乐天精
资深DJ郑启泰前天（3日）猝逝，终年56岁，消息震惊演艺界，郑启泰胞妹Fiona和未婚妻Angie今天（5日）到律敦治医院一同见医生了解情况。事后2人受访，Fiona表示哥哥Eric（郑之洋名）的真正死因仍未找到。
她说：“医生建议个Case转交死因裁判处进一步解剖，𠵱家我哋唔会估任何原因，我哋都好希望外界唔好乱讲，同埋我代表父母多谢大家关心，我哋全部都收到，畀啲时间我哋去处理。”
问Eric事前身体状况如何？Angie说：“佢身体一直都好好，朝早一齐做运动，我哋成日食生果，注重健康，本来打算Join gym，想身体健康影辑好靓婚纱相，奈何有唔开心事发生，但我哋都会一直keep住Eric好好嘅spirit，一直生活落去。（未影婚纱相？）未影，所以谂住健身食健康嘅嘢，早睡早起，呢个係我哋本身习惯，我哋不嬲都有做嘅，但係结婚要更加谨慎。”
至于Eric出事前几天有没有身体不适？Angie说：“其实佢又冇乜，係有啲攰，佢好清醒，同平时一模一样，冇乜特别，我哋有讲有笑照睇电视。（妹妹：佢好健康嘅，所以大家唔好揣测太多）。”
有指Eric急性肚疴？她说：“其实佢有肚疴，唔係急性，係断断续续，唔係去得好多次，但都有肚疴。（除肚疴有没有其不适？）有少少脚抽筋，食完蕉就冇事，屋企长期有蕉在家。”问到Eric父母状况，Fiona说：“佢哋OK，Angie及Eric中学好友陪佢哋食饭，好想将Eric好乐天﹑乐观及大细路性格，继续传承落去，父母都OK，我哋会睇住，Angie变成我哋家人，大家可以放心。”
Angie在社交平台贴出多张和Eric的照片，她说：“呢两年好开心，Eric带畀我好多欢乐，佢係好正能量嘅人，好希望将佢呢个Spirit延续下去。”
谈到有关Eric的丧礼，Fiona说：“噚日跟Eric好友倾咗一轮，佢唔锺意传统嘅嘢，古灵精怪，会同佢安排别緻送别会，希望大家唔好带住忧伤，要记住佢嘅乐观同大孩子性格，我哋再有安排会通知大家。佢係基督教徒，嗰日都请咗院牧祈祷及唱圣诗。正常程序大概3个星期会有结果，但碰巧係农曆年，要3个几星期就会有结果，都係等时间安排及等电话，（追思会要等农曆年之后安排？）係呀，一定。各位有心。”
至于Eric何有心愿未了？Angie说：“佢好想同Fiona出本书，都写到差唔多，我哋会同佢完成件事。”Fiona亦说：“几个月前佢联络我，因为我係画画，佢用文字出一本书，我哋做咗出嚟大家都会知道，我﹑Angie及中学同学帮佢达到心愿，我哋觉得佢56年人生好圆满，无悔﹑带好多快乐畀大家，佢由细到大都好乐观。”
