星岛：黄智雯自称少少白痴甜讚老公有勇有谋 离巢乜都试呼吁想玩超辛苦真人骚
去年10月，黄智雯宣布跟拍拖11年的珠宝集团高层詹文天（Anthony）结婚，12月再公布跟TVB结束16年宾主关係。龙年开始人生新阶段，詹太最想多参与电影及综艺，仲话唔怕辛苦，最想玩真人骚。已成人妻的她更有别过往，将老公挂口边，冧讚对方好叻，适当时候会扮隐形，但讲到生小朋友，41岁的她表示有共识唔心急做父母。
採访：杜杜 摄影：朱伟彦 髮型:Jay @ HoLA 化妆:谚瞳.小白 服装:self-portrait场地:The House
智雯在TVB的最后剧集《再见·枕边人》刚播出，她希望龙年身体健康，称以往剧接剧反而更fit，工作方面，就想跟不同演员和团队合作，特别想拍电影和综艺，而2019年拍过真人骚《一个因去跳舞》的她，满脑子真人骚Idea，“好想拍啲攞苦嚟辛，例如谂10个挑战畀我，係我从来未做过，好似得1个月时间准备要爬到上山。”
拍剧唔係为攞视后
智雯在TVB 16年，8度获提名“最佳女主角”，更3度打入5强，2018年凭《三个女人一个“因》攞埋星马双料视后，但跟视后始终无缘，难怪离巢被解读为TVB欠她一个视后，不过当事人却另有想法，“奖项实在有太多因素，演员求咩啫？！想有个代表作，角色有人喜欢同共鸣。”
她最喜欢的《三个女人一个“因”》就能做到，“收到好多message都话‘我以前有情绪病，好唔开心，睇完个剧带咗好多快乐同正能量畀我’，呢个就係用钱换唔到，透过角色畀到正能量观众，係我最想做到嘅嘢，唔係为攞奖。”
该剧令她难忘，还因角色的其中一个人格“Pina Colada”，内藏她鲜为人知的热情奔放一面，她更自爆饮大咗的怪行“饮咗少少酒，好开心，同‘胡说八道’佢哋玩MMA，两个女仔揽埋一嚿。”此一面连老公都未见过。
主动要求拍《隐门》
智雯承认入行16年遇过不少低潮，会不断怀疑自己，如2012年剪短髮拍《飞虎》，“几唔开心，点解好似重複咗，係咪越嚟越man？係咪做唔到女仔啲角色？每个阶段都会有啲咁嘅纠结，去到樽颈位就係做比较多专业人士同正经角色，係咪重複紧？观众係咪觉得又係睇紧同一样嘢？会有啲担心。”
遇到问题，她选择主动向公司提出拍《隐门》，“好想试吓比较有血有肉，複杂啲角色，《隐门》开头係个好惨好弱质嘅女仔，之后黑化变成会杀人，起伏好大，终于有个剧本好好玩。”
2021年她演出邓树荣执导的舞台剧《超自然之恋》，对她有好大衝击，“好锺意同啲做开舞台剧嘅人倾偈，佢哋睇法好唔同，我好多朋友，好似‘胡说八道’都係同一个圈，同吓唔同范畴嘅人倾偈，会听到好多好得意嘅ideas。”她暂别娘家就是想求变，“舞台剧可以试好多唔同嘅嘢，自己都会有惊喜，原来我都好想求变，仲有追求嘅心。”
生B有共识睇天意
婚前的智雯唔多讲男友，但婚后就愿意讲多啲，更开行讚赏Mode停不了的狂讚，“哈哈！佢扮演聆听者，有时又好似隐咗形，佢嘅隐形係好尊重我嘅私隐、工作模式，好支持我，叫佢睇返啲剧会有亲热镜头，佢都会唔睇，话冇兴趣，因为呢个係我工作。”
Anthony在适当时候又会充当军师，“我咩都同佢讲，譬如今次工作上咁大决定，我好跳脱想做就做，但佢比我有远见，有铺排，有啲准备先至行动，当然演戏范畴就冇得问佢，但日常、数字嘅嘢我会有少少白痴，会问佢意见。”
新婚的她正学习在家庭和工作取平衡，好彩身边有好多成功例子参考，“投入工作但家庭都唔可以忽略，係好难manage，（胡）杏儿、Ada（蔡少芬）或者朱茵姐姐都做得好好，都係我目标。”
至于生龙年BB，她就跟老公有共识，“随缘啦！咁多年大家都有讲呢个话题，有共识唔需要有太大压力，如果个天畀呢个礼物，当然好开心。”
