星岛：周吉佩呻做到隻积被“老婆”欺凌冇饱饭食 扩充音乐中心做到去厕所都冇时间
周吉佩(吉吉)在《中年好声音》封王近一年，吸金过百万，农曆新年前吉吉扩充了音乐中心，但在公在私幕后大老闆都係老婆黄彦欣，所有行政事务都交畀老婆处理。𠵱家两公婆朝夕相对一齐做嘢非常开心，不过磨擦较以前多，吉吉希望新一年两公婆少啲拗撬，可以融洽工作。
採访：方骞平 摄影：朱伟彦
月前周吉佩开设的《好声音中心》音乐中心，豪花6位数扩充及乔迁，𠵱家生意都唔错，但老婆永远觉得唔够；吉吉有所“投诉”：“我话过每日最好教4至5个学生，畀小小时间我中段休息，点知佢日日如是，安排我由下午2时直踩到9时，连去厕所都冇时间呀！你知教唱歌係要做到足，冇得呃钟㗎啦，返到屋企变咗人乾咁，咁夜连晚饭都冇得食。”黄彦欣即否认唔畀饱饭老公食：“你咪食完午饭先开工囉，係你自己戒食晚饭啫。”
老婆不满形象被摧毁
吉吉还想当年：“多年前老婆话过想做我上司，话想差遣我，仲幻想我哋一齐工作状况…估唔到𠵱家成真。”黄彦欣偷笑说：“係我想欺凌佢。”不过，黄彦欣坦言唔多习惯同老公一齐工作：“佢由头到尾都当自己係艺术家，个人又执著又多意见，会问返我‘点解咁做？想得到乜结果？’”
语毕，黄彦欣爆吉吉係紧张大师，常追住问：“呢啲嗰啲执咗未？”又常点她吸尘及抹玻璃门：“我都唔明点解重覆又重覆咁做？”吉吉自爆近日两公婆经常有拗撬，闹得最多就係老婆怪佢态度唔好：“有时答佢‘唔得閒呀’、‘快啲讲’…佢听完会扯火，好彩嬲完好快冇事。”黄彦欣带点不满回应：“我形象畀你摧毁啦，讲到我咁恐怖。”
