陈滢踏入35唔再急住结婚 因呢件事与对象冇下文：我易呷醋
“我有呢啲嘢好正常呀！但係唔係㗎，就算出生喺度都唔代表你会拥有呢啲嘢，唔係所有嘢都係理所当然。”陈滢在剧集《家族荣耀之继承者》中饰演富家女丘芷彤，虽说是生于一个充满尔虞我诈的大家庭，但这个角色却表现出一种与世无争，只专注于自我的发展的态度。
陈滢接受《香港01》专访时，直言大感认同，她说：“呢个係啱嘅态度，有时你谂歪一边，想去争一啲嘢，就好似掘紧一个窿畀自己，愈要愈多好难去满足自己需求，可能会做一啲自己唔係好想做嘅嘢。”
摄影：林迅景
陈滢直言，以前的自己就似是《家族荣耀之继承者》的其他角色一样，认为很多事物都是必然的。她分享了一个未入行前的小故事。“屋企有三姊弟，我就係夹喺中间冇乜人理嗰个。”
自己同丘芷彤好似
她续说：“细个有个好强嘅感觉，就係咩都係买畀家姐先，所以佢考咗车牌就买咗架Benz畀佢。我一到16岁定18岁考车牌，一考车牌就问：‘爹地～我考车牌喎，点呀？’之后佢就话：‘冇喎，你咪同家姐share一架车囉。’我话：‘吓？’”她直言，当时家姐十分之“大家姐”，所以实际上没可能与她一起分享一架车。
屋企人“大细超”：有少少心理唔平衡
陈滢说：“嗰时会谂，点解你有我冇？点解畀你唔畀我？又或者夸张啲，就係细佬一读一读书就係读私校，而我就係读最普通唔使畀钱嘅公立。争好远㗎！佢哋着制服吖嘛！同埋有司机车佢返学！我自己行㗎！嗰阵仲要搭巴士，落雪嗰吓真係会有少少心理唔平衡。”
回想起往日的画面，陈滢自言与《家族荣耀之继承者》的丘芷彤十分相似。既然没有那些“以为自己应该有的事物”，那就靠自己去创造、得到。她说：“没车，唔一定要爹地畀我，冇话一定要佢畀我先啱，我就自己赚钱买。嗰时我第一份part-time，之后喺香港做嘢。我而家叻就係叻在，真係变成最独立嗰个。我好骄傲，而家屋企人成日都讲：‘估唔到你哋三个对比，你会係而家最独立同埋咁……我唔想讲叻，但係都几好啦。”
同“视后”佘诗曼合作
见过“视后”佘诗曼，及与佘诗曼合作过的人都会觉得“佢气场好劲”。回忆起与佘诗曼的相遇，陈滢自言当时心情就与普通小粉丝一样那麽紧张。在拍摄现场见面时，佘诗曼可能都知陈滢紧张，用了一句就令陈滢变得……更紧张。陈滢回忆道：“我记得第一日拍嘅第一场戏，我哋拍啦，佢都知咩係紧张，一见到我就即刻：‘你当拍《痞子》得㗎啦。’我话：‘唔好玩啦，点当你係JW。’
“之后佢讲完之后都好nice，就话：‘不如我哋影张相啦。’我仲有嗰张相，完全睇得出我紧张到笑到硬晒，但係佢真係好好，好nice，好肯去教我好多嘢。”陈滢也透露，有一次她不明白某一场戏中自己角色的心境变化，就whatsapp问了佘诗曼，怎料佘诗曼竟然花了很长时间，非常细心地用分了很多段录音讲解给陈滢，令她大受感动！
佘诗曼令我“的起心肝”减肥
“呢个真係㗎！佢好成功咁用佢方法劝服我去减肥。”陈滢坦言，刚开始拍剧时她“睇落好肥”，有一次演员一起食饭时，就被佘诗曼用一个眼神劝服去减肥。
她说：“嗰时不啖嘢食差唔多入口嘅时候，佢就（畀咗一个眼色），然后微笑：‘真係要食吖？’然之后佢就会：‘好啦，食少少好啦。唔好食咁多啦。’其实我都为食，但係佢唔係叫我唔好食，就係话自己可以控制份量。呢样嘢我的而且确好听佢话，第一，我真係好惊佢，第二，我真係好尊重佢，好成功，亦都好想好似佢咁成功。咁就觉得，不如听佢讲，试吓係咪真係会好呢？当然而家真係瘦咗少少。”
“咁多年嚟终于有人令我听话，因为咁多年嚟网民又闹咗好耐，经理人同老闆又讲过，你哋（传媒）又成日写。你识咁讲就好啦，都唔知有几多个标题係咁。可能就係我唔受硬，我係受软，佢係好温柔好温柔咁同我讲。”
几时结婚？我宁愿慢慢搵
“几时结婚？”这个问题围绕住不少香港女性，就算是对人靓演技万人迷的陈滢也不例外。对于年届34的陈滢来说，结婚已代表了另一种意义。陈滢：“而家冇识新朋友，见亲嘅都係以前认识嘅人。我几锺意收工返屋企，同狗狗相处。返到屋企嗰刻真係开心嘅，暂时我觉得自己真係几舒服。”
“几时结婚呀？拍拖未？都咁大个女啦。事实上真係有人咁问，我谂我之前会担心呢样嘢，一直畀自己目标好似30岁前要结婚，到30岁就当35前，而家都35啦，我唔畀自己呢个压力。因为我如果去跟住呢个时间表，我惊遇到个唔啱。”
她表示，见到身边人因为年龄关係去搵另一半，但到头来双方还是不合适，“结咗婚都唔workout”，所以宁缺莫滥。她说：“我发觉当初就係佢哋唔够了解对方，所以我唔想係咁。我自己畀自己目标，如果结婚嘅话，就真係唔想分开嗰隻，所以我宁愿慢慢搵，而唔係做咗呢件事之后先发觉唔啱。”
何为“啱嘅对象”
何为“啱嘅对象”？陈滢很快的回答：“要同我谂嘅嘢……其实一识就知夹唔夹。我本身係一个比较敏感嘅人，我好快就知呢个人夹唔夹。可能性格唔可以太内向，因为我都多嘢讲，之后都会大概知道呢个人合唔合眼缘，知道可唔可以对一世。我觉得同我识嘅嘢唔好偏差太大，所以我谂唔可以叻过我太多，因为我会喺佢面前太蠢。”
即是说，男方在财力上不能比你多？她回答：“唔係，即係你日日讲嘅嘢我听唔明，我谂係个职业问题。”会不会选择与圈内人？她又回答：“我会觉得我唔太抗拒亦唔太过想係，好多嘢都係要夹，但係我都唔太想係，因为我自己易呷醋。因为有危机感会令自己冇安心感。”
因了解而分开
“我曾经试过有一个男仔，尝试去了解，但係佢反而唔OK我做呢一行囉。后尾梗係冇一齐到啦，如果唔係我就唔会同你讲呢件事，了解紧，但係佢好快就发觉佢handle唔到。因为我都係咁样，即係我（代入佢角度），我都明点解最后唔得。”记者很好奇是不是“我识唔识？”不过就被她否定。究竟係边个咁好福气呢？
