星岛：周家怡爆周国贤著孖烟囱要打底：惊我博懵吖
《无人之境》首演夫妻拍亲热戏惊觉性别对调
周国贤（Endy）和周家怡最近在ViuTV原创剧《无人之境》首度合作演夫妻，最初有担心，但因两人有太多相似位，好快就打破隔膜。虽然好啱嘴形，但家怡惊觉他们似性别对调，更踢爆拍锡锡戏时，著住孖烟囱的Endy竟要再加打底裤，令家怡搞笑大呻：“係咪惊我博你懵吖？！”。採访：杜杜 摄影：谭志光 髮型:Vincent Yeung(家怡)、Eve Chiu(Endy) 化妆:Herman Ng(家怡)、Winki Tsang(Endy) 服装: i.t(家怡)
Endy和家怡拍剧前并不认识，Endy形容“完全是两个平衡时空”，最初有点担心，家怡笑着追问他：“担心我虾你呀？”Endy否认：“我哋饰演呢对夫妻密度好高，感情要鑽到好深，担心够唔够时间同对手咁短时间入到戏呢？！”但好快已令Endy放心，“第1次见面我几紧张，但即日见佢比较豪迈少少嘅一面，有少少热情，就放下心头大石。”家怡笑言：“最初我啲nice係掩饰我紧张。”
夹到诵经方式一样
两人同在1979年出生属羊，却夹晒口供扮细个，Endy笑谓：“你03年，我91年嘛！”家怡说：“03年又太夸，啲人闹呀！九运嘛！91年OK！”问到点睇对方为人？Endy未开口家怡已话：“唔好讚呀！”Endy扮唔理，“佢演技好外，亦好可爱、娇俏，03年出世嘅人都係咁。”听到讚美声家怡笑指：“哗！够啦！飘起啦！”家怡发觉他们有太多相似地方，“佢无端端拎啲鼠尾草喺度燻。”Endy说：“我哋放饭，佢又拎罐辣椒酱出嚟！”家怡感到最神奇是连诵经习惯一样，“唔係诵咁简单（Endy：我哋係Rap！）真係好少有，我搵唔到呢行有人一样咁癫，《地藏经》係十三品就咁读都要个半钟，但我哋可以背。”
家怡认同Endy啱嘴形，但性别却对调，“佢係女嚟，我係仔嚟，佢好鬼麻烦！”家怡踢爆拍咀嘴戏时，Endy竟要着打底裤，“男人老狗，着孖烟囱点解要着打底裤呀！？”Endy解释是舞台剧常用免露出个咪的“收咪裤”，家怡不理继续讲，“成日话係收咪裤，着咗落去明明条所谓收咪裤长过条孖烟囱，点会得㗎？！”Endy笑着再拆，“肉色，我有摄高㗎！”家怡越谂越不满，“谂返转头，真係怀疑你係咪惊我博你懵吖？！搞到我好似好咸湿咁！”Endy解释，“我哋企喺梳化上面油牆，梳化会激情过喺床，仲要着住孖烟囱锡锡。”
家怡投诉，“所以你就打底，摄个嘢惊我摸你係咪？！岂有此理！”Endy唔识回应，但家怡检讨可能问题出于自己太主动，“拍呢啲戏知男仔会避忌，怕好易畀人话咸猪手，我要令对手放心，一定要好劲咁，嚟啦！哈哈！唔知係咪我落多咗两钱肉紧，佢以为我会咸猪手呢！？”Endy笑着否认，“我锺意温柔啲，你好粗暴呀！”家怡笑说：“我下次试吓温柔啲，over act少少，sorry！谂住令到你舒适啲。”
认同坦白对另一半
讲完亲密戏，家怡担心观众理解错戏种，故事其实讲一般结婚10多年夫妻遇到的问题，跟访问气氛完全相反，感觉较沉重，而其中一场衝突戏令他们最难忘，“好夸，有10几页纸对白，我哋唔係舞台剧，剧集、电影未试过咁多页纸，仲要得两个人，拍足一晚好攰，心力交瘁，条气好似开咗刀破咗咁，喊到对眼睁唔大。”Endy感激拍完这场戏后，单拖再拍自白场口时，家怡陪伴在则，“佢其实走得但係冇走，一路喺度陪我，我演紧时听到佢都有情绪，淨係喺度索吓鼻已经好帮到。”
剧中Endy饰演的小男人，因八挂利用航拍机意外发现邻居以及家怡饰演的老婆秘密。问到跟另一半相处，是否如角色收埋秘密？单身逾10年的家怡就笑谓，“哗！long long time ago，等我谂吓先！如果我当初係咁就醒，我就係乜都讲好蚀底，其实係搵咗错的人，如果啱嘅人应该乜都可以讲。”
Endy认同，“细个时乜都唔讲，或者有嘢想讲又唔敢讲，因为惊佢嬲，其实坦荡荡会好啲，但係有技巧。”家怡忍不住取笑他，“话惊佢嬲嗰吓，好似啲女仔。”Endy即扮娇嗲，“咩啫！係唔讲仲嬲嘛！对唔住囉，家怡姐！”原来家怡试过坦白未必从宽的伤心经历，“我以前好低能嘛，话以前拍拖嚟过呢度，讲完后依家呢个又记咗喺心，我讲嗰句係冇咩意思，但佢听完都会唔开心，其实我係咪唔係好ready？！唔关人哋事係自己问题。”
