星岛：晨丽亲揭与富二代马主关係：好感朋友 新剧重返女一捱打搏到尽
于TVB剧集《轻.功》后，朱晨丽等足两年终于再有剧上，而且新剧《反黑英雄》中仲係重返女一位置，故朱朱好重视呢套翻身之作，不讳言咁耐冇见，要畀大家睇到朱晨丽仍然做幕前。
对于跟富二代马主史昊洺嘅绯闻，朱朱形容做得朋友一定有好感，亦唔排除发展可能：“我只希望事业快啲可以好啲，自己搵到钱比嫁个有钱人更稳阵。”
採访：方骞平 摄影：谭志光 化妆：Henry Li 髮型：Terrence Chan @HoLA il colpo hair & pets 场地：Studio Meta
朱晨丽于《反黑》中饰演高级督察，和陈山聪双剑合璧破案。重返女一嘅朱朱搏到尽，除有唔少跑楼梯戏外，仲会打人及首次挑战被打：“今次拍到手脚瘀伤，keep住跑楼梯攰到不得了！尤其同啲孔武有力嘅大隻仔拍埋身肉搏戏，为求逼真镬镬都打得好金，印象最深刻俾人打到揈嚟掏去再挞落铁板货柜，要识得就力，自己都惊会毁容，但一埋位就要扮镇定。”
最近朱朱与史昊洺传绯闻，甚至一度传她怀孕箍实男友，她开腔交代两人关係：“我哋只係私下会联络嘅朋友啫。”语毕朱朱补充句：“但我唔係成日同人联络倾偈嘅(係可发展对象？）呢啲唔知，我成日周围去做嘢，睇吓缘份够唔够。”
当追问欣赏史昊洺甚麽？朱朱吓了一声，带笑推说：“做得朋友嘅印象梗係ok啦。”不过，现阶段以事业为重：“我只希望事业快啲可以好啲，因为之前返咗内地拍嘢及去咗拍电影，啲人以为我离开咗TVB唔使做，哈！其实我好勤力搵钱。”
被指样貌进化得啖笑
对于屡传有富二代男友、住豪宅及样貌进化到5.0，入行14年嘅朱朱唔再介怀反而形容得啖笑，她哈哈大笑道：“用美图app影相话百变样；喺café弹琴、借朋友屋企露台‘打咭’话我搬豪宅；富二代又係我男友…可能啲人想我过得好啲，所以有咁多幻想，多谢大家畀我咁多娱乐性，我会努力㗎啦，最重要身边人知道真相！不过，当然有对象有实力可巩固生活，但自己搵到钱比嫁个有钱人更稳阵。”
