星岛：杨潮凯趁电影好市道离开大台发围 乘演员优势易搵人开戏
39岁杨潮凯月前宣布离开TVB，结束15年半嘅宾主关係，未来重心发展电影导演梦。2021年杨潮凯首次执导电影《喜欢妳是妳》扬威海外，连夺两奖，眼见近年香港电影有唔少佳作，他直言都想拍啲嘢出嚟，就算𠵱家市道唔好，但唔会影响开戏：“做演员嘅好处係啲人认得我，易有话题，沟通上比较容易。”採访：方骞平 摄影：罗安强 场地：Shop 9
过往杨潮凯有唔少剧作，包括《点解阿Sir係阿Sir》、《天与地》、《法证先锋IV》等，而《降魔的番外篇—首部曲》更首做男一。潮凯强调喺TVB日子相对係幸运嘅，尤其出道不久已被委派演《天与地》陈豪嘅少年版，虽然唔係主角，但戏份唔少，获观众认识。之后更多得阿Bob(林盛斌)为他穿针引线，做埋《大玩特玩》、《识玩旅行团》等综艺节目，旧东家有咁多发挥，离开係唔易决定：“其实公司有提供其他合作方案，但我唔想推太多job，唔好意思白𢭃人工。”
由天堂跌过落地狱
杨潮凯喺TVB 15.5年，坦言都试过“怀疑人生”：“《点解阿Sir係阿Sir》casting唔到‘K4 ’四大恶人，只能做‘二五仔’；拍完《天与地》之后又打返落去行行企企，冇对白嘅大茄(茄哩啡)；最难忘喺某套剧入面，我要吊‘威吔’爬牆，但唔使见样，点知扯上去时嘅回弹力，大髀撞向牆身撞到‘啪’一声，我双腿痹痛咗30分钟，好彩只係皮外伤，但休息过后都要顶梗上，及后真係怪自己不自量力，反问自己做紧啲乜？”
杨潮凯明白到演员身份好被动，做导演却变得主导，尤其将想拍嘅嘢呈现出来：“其实开戏唔难，锺意拍电影嘅人就想拍一部好电影，我会Keep住跟唔同人分析，让佢哋明白点拍，去达到佢哋心目中要嘅嘢。𠵱家外闯唯一係收入唔稳定，但年前我经已将香港物业出售转移美国置业，租金回报率足够我屋企日常开支。”
