星岛：欧阳震华发晦气拒演惨被唱：话我嫌钱腥 曾狂收50个电话邀拍冇Budget电影
早前弃用英文名的欧阳震华，最近宣布加盟英皇娱乐，63岁的他决心转向电影圈发展，恨演反派以及跟好戏之人惠英红合作。他又直言“未搵够”冇退休打算，更回应到内地登台竟被指“凄凉”，“要拎住咁鬼重嘅咪唔凄凉？！”其实华哥早在90年代已有到影圈发展机会，除时机不适合外，最重要他狂收超过50个邀拍电影电话,都声称冇Budget，令他一度忍不住发晦气闹走对方，因而被唱：“话我嫌钱腥！”採访：杜杜 摄影：谭志光 化妆:Gary Chung
华哥因疫情期间经常在串流平台睇戏 ，令他很想拍电影，但有感在TVB难有机会，于是2020年约满TVB决定不续约。他认为英皇是最合适合作单位，就透过太太傅洁娴搭路，“欧阳太有啲太太团朋友，同霍小姐（霍汶希）即係Mani都识，就试吓水温，睇吓有咩反应。”点知一讲Mani即做嘢，“隔咗1、2日就电话到，我话唔使咁急，我话过埋个（农曆）年先。”他形容过程好顺利，“好爽快，冇拉锯情形出现。”
恨演反派同惠英红合作
华哥谓加入英皇娱乐令他好放心，讲到对未来期望，他表示徇众要求下最想演反派角色，“好多人话想睇我做反派，以前我唔係唔想做，只不过係唔畀我做，因为几十集剧，个男主角係坏人，得就得，唔得嗰几十集啲收视边个处理？！”他认为既然在电视圈“好人难做”，电影圈是唯一出路，“电影嘅反派都可以係主角，唔係一出嚟杀人放火嗰啲反派，好叻嗰啲反派都得。”
签新公司后，华哥最想跟同门的@惠英紅kara 合作，“我讲咗出嚟好贪心，唔係因为佢係女主角，我想做男主角唔係咁高攀，只係想有套电影可以合作，同佢喺裹面有交流。”其实他跟红姐认识多年，但一直没合作机会，“我识佢嗰时，佢未入TVB仲拍紧电影好红，我嗰时仲係游走紧2、3线，到我喺TVB上咗1线，红姐就入咗嚟，佢都沉淀咗1、2年，拍《法证先锋II》佢做阿佘（诗曼）阿妈，对手戏或者砌磋机会咪细咗囉！”
去年11月，华哥到南京商演被指半退休，更有网民见到他这情景用“凄凉”来形容。对于被指半退休，63岁的他没好气道：“我根本未退过休，亦冇谂过退休，只不过做与唔做啫！”他没想过退休，直言因未搵够，“梗係未够啦！”讲到外界一直认为他太太傅洁娴是澳门前赌王傅老榕的孙女身家丰厚，他应该不忧做，他就笑言：“应该咁讲，欧阳太有唔等如我冇，我咁多年不断努力工作，唔係食湿米嚟，同埋所有屋企嘅嘢都係佢话事，不过我决定，哈哈！”问到被形容“凄凉”是否可笑？他答得好妙，“凄凉到呀吖！又要坐飞机，又要企喺度做嘢，又要拎住咁鬼重嘅咪唔凄凉？！真阴功！”
精明拍3级片冇露过点
华哥其实早在90年代初已有不少拍电影机会，但以3级片居多，“嗰时好兴，男仔就搵TVB，女仔就搵ATV出去拍，我身边好多人都拍过。”但他接拍时通常都不知是3级，好似1995年的《XX犯》，“我都中过招，初初改个名叫《明日天涯》，哗！仲唔係攞奖！但后尾先知讲迷魂党落药柠檬茶，跟住变咗迷姦犯，其实迷魂唔同迷姦喎！但係姦嗰方面就唔係我做，係我啲手下做，但我变咗唔係主谋都係帮凶啦！”虽然拍过3级片，但他好小心并未有裸露演出，“我以前好精，合约写明最大暴露都要有条孖烟囱。”
华哥1982年入行，直到1992年凭《壹号皇庭》演检控官“余在春”才开始冒起，他坦承错过跳出影圈的好时机，“我喺电视台10几年先企稳，畀人感觉係不折不扣嘅电视人。”加上搵他演出的电影都不是主角，甚至是客串，“我假假哋喺电视台都係现役男一，就算唔係主角都要有个人物，搵我做啲群戏，我点返去同珍姐（曾励珍）交代，捧到你咁样，呢啲唔使人讲自己都谂到。”
当时亦因一通电话，令他绝迹影圈，“个个搵我拍嘢唔係话客串，係有角色，但每个人打嚟讲唔够3句啫，就话冇budget嘞！我听过超过50个呢啲电话，有次我就滚，我话‘点解你哋个个都係咁嘅，冇budget就搵我，有budget咪搵刘德华，我都未开价钱’，跟住佢话唔好意思就收咗线，咁以后唔使烦，冇人搵我啦，哈哈！一传十十传百，有人唱我话我嫌钱腥，好好笑㗎！”
