星岛：李龙基哽咽心痛未婚妻：罗湖监狱有好多蚊 否认合谋作故仔拒向被骗艺人致歉
上月19日，李龙基的36岁未婚妻王青霞（Chris）因虚假文书等五项罪名被判入狱25个月。将于本月21日举行《真情流泪基不可失》个唱的基哥，收拾心情接受《头条日报》访问，提到“罗湖监狱有好多蚊”突然哽咽，更为Chris大话冚大话解画，“可能佢想我威啲，作为李龙基身边女人要提高返啲，咁先MATCH到。”对被质疑想乾手淨脚撇甩王青霞而策划“入狱事件”，基哥力斥造谣者，“𠵱家香港人变得好负面，睇人仆街最开心！”採访：方骞平 摄影：罗安强 场地：hotel icon天外天
73岁的基哥为王青霞案件孭咗大笔律师费，坦言有钱搵，唔再介意演唱会用咩名义出发：“我明白嘅，主办单位借呢排新闻招徕，最重要吸引到观众入场，原来啲人唔知我会唱歌，𠵱家反而多咗新Fans，包括惩敎署职员，所以世事冇绝对，唔好睇得咁负面，呢段时间经历咗咁多事，我同‘老婆’真係睇开咗好多。”
近数月，基哥和何伯成为“花生友至爱”，基哥表示：“我唔想因为咁(王青霞事件)令自己咁红，咁红冇意思，只想用歌感动人。”基哥唔介意俾何伯抢风头，更感同身受：“人与人之间感情冇得解释，两个人嘅事外间唔会知。”结过两次婚，交过多个女友的基哥向在狱中的Chris许下爱的承诺：“就算仲有诱惑，但心底尽量做到保证，呢个係我最后嘅女人。”
觉得Chris会做返好人
经此一役，基哥坦认Chris有向他道歉唔够坦白，他有信心Chris会懂得反省，做返个好人，“以前佢后生谂唔通鑽牛角尖，可能佢想我威啲，作为李龙基身边女人要提高返啲，咁先可以MATCH得到，而我真係好爱呢个女人，被爱情蒙蔽会绝对信佢，亦都宠坏咗佢，我心态係‘唔影响咁大，冇伤害到别人就由佢，提升自己冇嘢喎’，不过，若然我再清醒啲，唔会有呢啲嘢发生，甄妮评论我‘扮猪食老虎’，我承认我真係猪，係LuLu。”
基哥曾公开讲过坐过Chris揸嘅飞机，又讚过对方画功有艺术天份及出身富贵！基哥唔认合谋“讲故事”：“我绝对冇讲大话，2018年喺美国时，我坐住佢揸嘅组装直升机，喺佢公司上空好短途咁飞咗一圈，当时唔知佢冇牌㗎，其实揸直升机好简单，以前学过都有概念，尤其美国好儿嬉；至于画画，佢第一幅画畀我嘅画，我觉得佢係有天份，打后嘅临摹淘宝画作，我唔理佢啦。”问到被揭发偷图又如何？基哥即无言以对：“𠵱家我知道咗，若然係真就过份咗，但案件尘埃落定，不再深究。”
问到会否向所有被骗艺人致歉？基哥包容说：“无需要，佢做过啲乜大家已经好清楚，已受到应有惩罚，乜都还晒，无需要受2次伤害。以一个娇生惯养嘅女仔嚟讲，政府罚得佢好重，而且每个人都有过去。”基哥忍唔住哽咽：“每次谂起佢喺入面好心痛，罗湖监狱有好多蚊，佢要坐到明年7月7日…”追问点解决呢年性需要？基哥哎呀一声说：“冇所谓啦又唔係20几岁咁渴求，我最大兴趣係玩模型飞机，玩飞机一样得。”
慨歎香港人变得好负面
另外，基哥最不忿被指係“幕后黑手”，举报Chris：“唔明佢哋点解会咁谂，我为咗呢个女人淨身出户，将8层楼连2个车位(最新)畀晒前妻(第2任妻子)，我对钱好冷漠，作‘故事’嘅人可以做编剧…”他又慨歎香港人变得好负面：“睇人仆街最开心，呢个氛围最唔好！𠵱家网上媒体为刷流量锺意讲乜就讲乜嚟伤害人；传统媒体都应该要隐恶扬善，社会才美好。”
基哥以1967年木屋屋顶俾超强颱风温黛吹走，由父辈朋友筹钱重建作例子。“人与人之间要互相帮助，𠵱家啲人只会剥花生挖人阴暗面，话我日头见Chris入狱就喊苦喊忽，夜晚笑晒口去叶子楣生日会，其实係朋友狂打3次电话叫我去解闷。”他形容心脏已变得强大，所谓“一犬吠影百犬吠声”，唔使理会，他坚称唔会改变做嘢态度：“如果因为Chris影响到对我嘅睇法，係你眼光唔好。”
