星岛：周吉佩有谂头开鸡精班助中年人参加《中音3》
攞进步奖又开处男个唱追梦下半场好梦幻
37岁周吉佩凭《中年好声音》延续音乐梦，搵到第一桶金。最近他推出新歌《Falling For You》，并宣布年底举行处男个唱。因为自己成功追梦，吉吉不时鼓励中年人参加《中音3》，他更自爆睇准商机，经营的音乐中心开咗“鸡精班”，教导参赛者如何顺利参加比赛，除咗针对歌唱技巧，仲以过来人身份辅导及提供拣歌贴士，令追梦之人行少好多冤枉路。採访：方骞平 摄影：朱伟彦
最近吉吉出咗轻快情歌，唱出一见锺情感觉，故舞蹈中加入派心心元素。MV中吉吉跟女神贴住嘴，他急急强调只係角度问题：“拍MV啫唔使咀啦，要问准老细(老婆)先可以做。”
年底举行个唱的吉吉，计埋剧集歌仅得5首单曲，吉吉不担心唔够歌：“咁2015年组乐队sp’ACE时都累积咗10首歌，加埋参赛时唱过嘅歌一定够，其实演唱会主题係重温10几年嚟人生转变，将周吉佩故事跟观众分享。”
他想当年，同期出道战友有黄宗泽、G.E.M、王祖蓝、可岚、狄易达等，𠵱家各有发展，继续唱歌的不多，反而他多年来都KEEP住唱歌，只因疫情期间被迫全面停唱转做文职，加上沿途有前辈黎瑞恩不时鼓励：“你係得嘅！”又唔算係惨。他感恩说：“开到一间音乐中心经已好满足，更何况啱啱夺得《十大中文金曲》“最佳进步奖”银奖，相隔16年获得个人奖项，感觉梦幻。”
参赛要从拣歌入手
因此，吉吉鼓励中年人及学生参加《中音3》，仲畀贴士叫参赛者从拣歌方面入手，至少有30首大家都耳熟能详嘅“饮歌”在手，不用执著玩乐器及跳舞，他更自爆：“《中音3》接受报名以来音乐中心多咗同学上加操堂，我哋又会开鸡精班，帮参赛者拣歌出战及做心理辅导，𠵱家音乐中心变身中年人嘅PARTY，好热闹。”但吉吉强调，评判们唔会因为吉吉学生而手鬆，拉分方面冇优势。
