明报：前J2主持文颂男离世 终年29岁 遗言：感激各界一直关心
前J2台主持文颂男（Koba）去年10月患上罕见癌症“尤文氏肉瘤”后全面停工接受治疗，经过大半年治疗病情一度好转，惟早前发现肿瘤扩散，大半身瘫痪。他早前表示情况不乐观，正步向生命的尽头。
今晚10时文颂男的Instagram发出预先撰写的长文，宣布他已离世的噩耗：“好抱歉，喺呢度要同大家讲一啲好沉重嘅事。当大家睇到呢一篇文章嘅时候，我已经离开咗人世。
呢几个星期以嚟，我一直努力接受自己身体上嘅变化。呢段时间，我选择咗唔对外透露自己嘅病情，亦冇同任何传媒交代，因为我未有勇气去接受呢啲变化。其实，早喺2024年6月22号，我就因为下半身完全瘫痪、完全郁唔到、冇任何知觉而入院。呢个情况亦令我排唔到尿，所以当时要紧急送入医院。自从入院以嚟，到我撰文呢一刻（2024年7月10号），已经接近三个星期。唔好讲病情冇好转，反而越嚟越差。胸口以下仍然係完全冇知觉，完全控制唔到排泄功能，需要换尿片同埋插尿喉。癌细胞已经扩散去好多唔同嘅位置，例如胸、肺、多个脊椎、淋巴，甚至有啲肿瘤我可以喺外部摸到。有知觉嘅地方都感觉24小时都好痛，例如肩胛骨、颈椎、头皮。我仲有气促，心跳长期偏快，依家要吸氧。每朝早都会有发烧嘅感觉，不过量体温就量唔出发烧，而且仲会觉得好冻，但就出晒汗，身边嘅人感觉我发紧热。
医院已经开咗好多唔同嘅药畀我，不停调整剂量，虽然有抑制到大部分症状，但仍然都係好辛苦、好唔舒服。医生同我商量过，再做康复治疗都冇作用，只能够做一啲舒缓性治疗，见到有咩症状就做相应治疗抑制住佢，等我过得冇咁辛苦。简单嚟讲，依家就係等紧死，纯粹希望死得舒服啲。喺人生嘅最后一哩路，非常感谢亲友同各界人士一直以嚟嘅支持同关心，呢段旅程有你哋陪伴，我感到无比幸运同感激。”据称文颂男今日下午离世。
