郑裕玲批评奥运主持採访似审犯欠同理心：派人出去访问有冇要求？
近日巴黎奥运进行中，各大传媒都争相希望做到好睇的访问，将运动员的说话传递畀观众。不过，观众对电视台的旁述和主持表现有讚有弹，而郑裕玲（Do姐）亦有发表看法。
日前Do姐伙余迪伟、余德丞、杰朱在商台节目《口水多过浪花》开咪时，就关注到有记者访问时运动员时似审犯：“我自己想讲少少嘢，係咪有阵时派出去，去访问嗰啲人，其实有冇要求呢？有时候有少少审犯咁样嘅，我唔知係咩心态啦，係咪咁呢应该？”有份做奥运主持的余德丞都明白记者的追访需要，但亦认为访问应以运动员为本，要尊重他们的感受。
Do姐认为被访的运动员有些是获得奖牌的，但亦有些是成绩未如理想的，採访时应有同理心，避开难堪问题：“而家接受访问嘅唔係个个都攞咗个牌、好成绩嗰啲，可能佢係唔好成绩、失落咗、或者失误咗，佢都未嚟得切自己唔开心，就已经要面对你嘅质问喇，佢想喊都冇时间，你已经问‘点解你要咁样啊？’‘你失败咗有啲咩感觉呀？’”Do姐就觉得不是太好。
虽然Do姐冇开名，但就不难令人联想到她所讲的是ViuTV的驻奥运记者饶家辉，早前他採访64强止步的港队柔道女将王嘉莉，对方落败后，饶家辉问：“完成第一场奥运比赛觉得点？”王嘉莉一脸难过表示不满意自己表现，他再追问：“唔满意喺边度呀？”王嘉莉回答：“输嗰下其实係比赛前係咁研究，谂点样防守得好啲，但最后都係做唔到……”他之后又问：“你赛前都讲过想同佢斗立技，但俾对手拖到用寝技，最主要关键係咩呢？你做漏咗咩呢有一刻？”、“跟咗蒙古教练一段时间，你觉得蒙古教练教你嘅嘢，呢场比赛你拎咗出嚟有几多？拎到几多嚟用？”
而另一条片，饶家辉访问乒乓球代表黄镇廷杜凯琹，二人成功晋级乒乓球混双8强，饶家辉问：“头两局分差唔係赢得好大，但係都叫攞咗两个得分，不过后尾争啲畀人压迫返上嚟，嗰度发生咗啲咩事？”之后饶家辉又问：“及后落后2比7，你可以压制到对手，亦都曾经6比7嘅时候有个暂停，刘国栋都有同你沟通，嗰度发生咩事可以连追9分？”、“啱啱出咗赛果喇，你哋下场对手係西班牙组合，点睇？”语气都比较倔、冇尾音，因而惹来网民洗版批评。不过其实饶家辉在行内都算资深，他是香港体育评述员，早年曾在无綫电视和亚视效力，后来加入nowTV至今。
其实Do姐08年都做过北京奥运主持，她透露出发前两个月，TVB专诚安排艺员去浸会大学上堂做准备，表示：“我哋08年北京奥运，有喺浸会上堂，我上咗过两个月，我有证书㗎！证书就係为咗证明我喺2008年北京奥运做过其中一个主持人，而呢两个月唔係二打六教嘅，全部都係教授，有啲仲係运动员转做教授，虽然两个月嘅时间係好短，但係如果你有畀心机上堂，你的确係学到好多嘢！”
