星岛：星8卦丨“娇嗲”“阿仔”真心相爱结良缘 奶奶变态行径破坏夫妻关係
另一个恶顶奶奶更加经典，又係寡母婆守仔希望“阿仔”结婚之后都同自己住 ，“阿仔”同“娇嗲”因为有共同理念同艺术修养都旗鼓相当，行内都觉得佢哋好登对 ，“娇嗲”仲係初恋，对“阿仔”痴心一片。但唔够两三年，“娇嗲”已经搬咗返屋企住，后嚟发现有咗bb至返奶奶屋企，因为验到係仔，所以即刻要佢返嚟，惊个孙畀“娇嗲”拎走。
“娇嗲”最后生咗两个细路，但同时亦宣佈离婚，带住两个细路返阿妈度，日子捱得苦但觉得好自由。佢同阿妈讲，由结婚第一晚开始，奶奶就瞓喺佢两公婆嘅房门口，佢第二朝瞓醒开门吓到尖叫，奶奶即刻闹佢大惊小怪，结果係每晚佢都瞓得好唔安乐，觉得奶奶𥄫到实，好大心理威胁 。
“阿仔”虽然知道阿妈咁做好离谱，但佢话过三几次之后都唔敢再话，因为最后俾阿妈闹然后喊，“阿仔”一见阿妈喊就完全无计，叫“娇嗲”忍让下，所以两公婆係屋企唔敢亲热，怕奶奶见到唔高兴，久而久之“娇嗲”觉得好似坐监咁，情绪都唔係太好，最后通牒係搬出去住，“阿仔”话唔可以离开阿妈，情愿唔要呢段婚姻，问你死未！
