星岛：蒋祖曼唔怕死想夏天拍古装 除咗埋位完全唔敢同黄宗泽讲嘢
蒋祖曼（Joman）在《法证先锋VI：倖存者的救赎》演国际名模“Nana”，要极速减磅兼首次挑战搞笑戏份，多得偶像黄宗泽（Bosco）傍住，搞笑冇难度。下个目标想拍古装，就算被工作人员拨冷水，夏天拍古装热到癫都唔理，非常坚持。 採访：杜杜 摄影：朱伟彦
曾任模特儿的Joman，知道要演国际名模，即用生酮方法瘦身，边拍边减咗15磅，嗜甜的她最痛苦是戒口，“好多朋友生酮咗好耐，畀咗好多贴士我，仲帮我准备咗好多即食包，最难係戒甜，我真係好锺意饮柠檬茶同食朱古力、雪糕，唯有食冇糖朱古力顶住。”睇剧本时另一个担心，就是角色是自恋的港女，“都惊会唔会好乞人憎？！监制话角色好有趣唔使担心，睇落‘Nana’虽然自恋，但嗰份我行我素係几可爱。”
演村姑都冇问题
剧中有不少搞笑场口，Joman多得好拍档黄宗泽帮手，“我拍惯正剧，好少做古灵精怪嘢，Bosco喺现场帮咗好多，佢本身搞笑底，会一齐度啲得意嘢！”Joman曾表示不够胆望住Bosco，她强调并非讲笑，“我真係唔够胆望住佢，连同佢讲嘢都唔敢，除咗埋位拍嘢，记者会都係第1次合照，佢好nice，係我问题，我係好I嘅人，对住佢有啲紧张。”同偶像Bosco合作完未够喉，Joman想再合作，“做咩都得，做返佢粉丝囉！哈哈！”
Joman签TVB已2年多，可以剧接剧好满足，今年更加愿望成真，试到想拍好耐的喜剧和动作戏，“好开心今年拍咗《武林》，角色打得劲又好癫。”她希望未来可以实现埋拍古装的愿望，“之前《轻·功》戏中戏拍咗少少古装戏，虽然夏天喺郊区拍古装，好热好辛苦，但试咗1、2日几好玩，工作人员话得1、2日梗係好玩，成套拍就知味道喎！不过我仍然想试吓，就算演村姑都OK㗎！”
