星岛：林景程捱足16年夺“男配”惊爆血泪史
曾被小生怒掷剧本 再畀导演玩残
40岁的林景程(阿King)演过《香港爱情故事》、《下流上车族》等不少好戏，演技一致受好评，直至今年初才凭《反黑英雄》“开斋”，呆晒的上台夺取TVB颁奖礼“最佳男配角”奖。奖项得来不易，自揭16年来自己错过又被玩过！除了受过某些导演气，被玩好委屈外；在新人阶段犯过大错，搞到被小生黑面抢走兼怒掷剧本，时至今日画面仍历历在目说：“佢咁恶我唔怪，係我搞祸咗场戏。”
採访：方骞平 摄影：谭志光 场地：Tsim house company limited
夺奖遭老父拨冷水
获奖阿King跟爸爸开心Share，点知却被泼冷水：“爸爸问我‘有冇奖金？有冇加人工㗎？咁要个奖嚟做乜？都冇用嘅！’我解释係一个值得纪念嘅里程碑。不过，我谂佢心底会戥我开心嘅，因为颁奖礼前夕曾心血来潮陪爸爸返去旧居饮茶，佢仲带我去同啲旧街坊影合照，口裡说不，行动最实际，我见当时爸爸好开心，只不过佢冇表达出嚟，见佢开心咁我都好开心。”
阿King没想过要扭转爸爸向钱看的想法：“我明白佢嘅年代冇嘢做会手停口停，要信服到佢，我可以赚到大钱，佢先至会唔担心我。如果有日佢肯要我多啲生活费，应该相信个仔经已生活无忧。”
被网民指他“终于捱出头”，阿King却表示，夺奖后冇乜改变，亦无意改变生活模式，唯一最大是心态上有转变，要对得住个奖，容错率会变低：“自己最清楚做衰咗喺边，睇返获奖作品《反黑英雄》，好多地方都要执一执，尤其未能把握到仅有嘅戏份交代每个段落层次，即使得奖仍然係抱住怀疑态度，有咁多‘沙石’，係咪做得到‘最佳男配’呢？因为个奖交得畀你，即係代表你可以全部做得到。”
犯错连累当红小生
提到辛酸史，阿King都有“大大镬”的难忘经历：“入行不久客串做医生，我以为嗰场戏冇剧本要‘飞纸仔’，一直在等‘纸仔’，直至临拍前先知係我搞错，好衰唔衰拍嗰场戏讲生离死别，由我向家属交代病者病情，呢场戏对后续剧情有好大影响，个个对手情绪到喺度爆喊，我就係咁NG影响到佢哋喊，当时导演忟到索性唔take我，叫我拎住剧本嚟读，但作为新人有咁大压力更加惊到口震震，乜都做唔到，最后我俾小生对手，一手抢走咗我手上嘅剧本，再将嗰份剧本抛走咗，好恶咁话‘照意思讲就算，畀我做咗戏先！’我唯有硬住头皮，避开啲医学名词将大概记得嘅意思讲一次，咁样反而成事！”
回想当时难堪场面，吓到猛讲对唔住：“小生对手的确係有啲恶，因为佢好入戏，状态处于愤怒及悲伤情绪之间，係恶喺个角色入面，就算佢恶我都接受，因为喊住仲要take2-3次，有咁嘅反应好合理。”阿King重提仍耿耿于怀，再认衰仔：“係我搞祸咗场戏，无论係点，演员要处理好对白问题，点都係不能原谅。”
被导演玩无所适从
另外，演艺生涯中又试过被导演无理针对，感觉受委屈：“嗰场戏讲我要望住门口，若有所思，再继续食饭，拍完第一次后，v导演过来提点：‘景程，望咁耐做乜？唔好搞咁多嘢！’我咪按佢指示做，点知后来畀监制怪责，指正‘其实望係有意思嘅，可以望耐少少’正无言时，导演走埋嚟加句‘係囉，景程自然啲做啦！’”
另一场戏要他在报纸档踎低睇书，然后再起身走人，同一位导演依然狂叫NG：“我都无所适从，睇返playback见所有动作咪做咗囉，发生乜事呢？跟住同佢讲返，个导演仲发晒忟憎回应‘你锺意点做就点做啦！’后来听讲，呢位已离职嘅导演专针对新演员，所以只能硬食，而且演员得罪导演冇运行。”
