周星驰一句点醒！蔡思贝甘心挨闹做临记
“视后”蔡思贝事业稳步上扬，过去几年剧接剧的她今个农历年假期决心做“宅女”，更相当挂住嫲嫲的“符碌萝卜糕”。入行不久已有机会登上大银幕的她，坦言就算挨闹都渴望能跟周星驰合作，一尝心愿。
今日（6日）正式踏入31岁的她，既做了视后，又做了业主，现时事业、感情两得意，她甜笑表示相当满足，各方面比上不足、比下有馀，说到虎年，她坦言希望大家可以用雪亮的眼睛评审她的作品。之前她有不少新闻，更试过被网民恶意针对，有段时间确实令她有点迷失，心情大受影响。
问到网上抨击是否对她影响很大时，她说：“之前有段时间好啲，但之后真系扰乱咗，如果因为一啲原因对我嘅作品唔公平看待，我觉得对工作团队好唔公平，我当然希望大家可以用番普通睇剧、演技、角色嘅角度去评价我，你好憎我都好，但唔好因为咁而憎我嘅戏剧，你憎我嘅话背后憎我啦！我唔想连累到其他剧组同事一齐糟糕，我好怕影响到人，好唔好意思，如果因为我而令到其他人嘅付出被抹杀，因为有我蔡思贝大家就唔睇，咁其他演员、导演及剧组人员摆嘅心机都冇晒，呢样嘢系我最唔想，你点搞我都得，但唔好搞我嘅事业，一搞到我工作范畴上嘅嘢，我就会好唔开心，因为我真系全情将我所有嘅嘢都放喺工作上，希望新一年大家高抬贵手。”
她透露想再尝试拍电影，望跟周星驰及曾国祥合作，她说：“曾国祥嘅电影系好有血有肉，啲剧本好写实，我好想有机会同佢合作，而如果可以同周星驰合作，佢点闹我都好，要我做临时演员都好，我都好想有一次机会，佢有句说话好启发到我，有一次佢喺台侧边，啲人同佢话‘周星驰你企番出嚟中间呀！’佢就话‘我企边度咪边度就系中间啰！’我觉得系真嘅，呢个系一个好好嘅心理质素，唔需要理人太多，唔需要同人去比较。”
过年做宅女
农历新年假期，她表示做宅女：“我会放空一下，由上年到依家都冇停过，拍咗3套剧，宅一阵先再努力，以前好多圈中朋友都会拍完一部剧就飞去第二度充电，然后先再拍，其实我一次都未试过，我好向往拍完一套剧即刻买张机票飞去第二度，不过之前一直都剧接剧，唔想错失任何机会，唔舍得咁奢侈，当依家感到疲态想实践时，又唔可以，惟有做住宅女先。（会否去绯闻男友胡鸿钧屋企拜年？）依家疫情应该唔会嘞！大家好朋友咪互相恭喜一下啰！在心中。”
她以前于外国读书，农历新年过得很平凡，家人吃饭时就齐齐与她视像“团年”，她说：“喺外国都冇乜节日气氛，因为我住嗰度都冇唐人街，只系视像时有一刹那感觉。”而她笑言最爱吃嫲嫲炮制的芋头仔同年糕，她笑言：“有一年嫲嫲冇落粘米粉，佢落错咗生粉，整出嚟变咗糊仔，但我又好捧场，因为由细到大我都好锺意食佢煲啲粥，我又好锺意食烂饭、糊仔嗰啲嘢，于是就索性用个羹𢳂嚟食，我觉得呢个符碌萝卜糕真系好正。”
