周家怡爱火重燃 一姐当“Part Time狗奴”
家吓呢个时代，“Part Time女友”就听得多，最近“英皇一姐”周家怡就兼任咗“Part Time主人”，不收分文之馀仲做得好开心。话说本属猫奴嘅佢，自从爱猫Crystal去咗彩虹桥后，伤心到崩溃，一度怕咗唔敢再养宠物。不过缘分嘅嘢就系好神奇，佢识咗白色松鼠狗Cotton，就令佢近乎死咗嘅心再重燃爱火，佢话如果遇上合眼缘嘅毛孩都会再养，不过一定系领养不购买宠物。
令家怡可以走出丧猫阴霾嘅Cotton，成身白雪雪，毛茸茸，一对水汪汪嘅大眼睛，的确识勾魂，加上佢个样真系好表情丰富，抱吓佢之嘛，Cotton好似识笑咁，真系教人如何不爱它啦。除咗家怡被Cotton彻底俘虏外，Cotton连佢爹吔、妈咪都搞掂埋，佢记得第一次带Cotton返屋企时，只狗一入屋都识得分边位先系一家之主，见到家怡父母就唔该都冇一声，一跳就跳去世伯、伯母嘅大髀度博friend系咁挨身挨势，就系呢招嗲功，搞到有啲啲怕狗嘅周妈，唔止唔抗拒，仲火速锺意咗Cotton，只系Cotton真主人系佢朋友，所以喺只狗嘅眼中，家怡只系“半个狗奴”咋。
