速递员路边除罩食饭被投诉 林盛斌闹网民冇同理心
新冠肺炎疫情持续，相信唔少人无论喺工作定生活上都受到影响，寻日（15日）有网民喺一个屋苑嘅居民社交网专页中，透露见到个速递员坐喺行人通道旁边，用手推车当做饭枱除低口罩食饭，个网民斥速递员影响卫生，表示已向物业管理公司同保安公司投诉。
艺人林盛斌（Bob）于社交网上出Post力撑呢个速递员，佢留言：“呢个世界，好多嘢，冇百分百嘅啱定错，但系有一样嘢，系最基本嘅，就系包容。呢段日子，对速递行业嘅影响非常之大，因为人手不足好多时一个人要做三个人嘅嘢，一日几万单确诊嘅时候，佢哋仍然辛苦工作，其实我真系好尊重每一位做速递嘅工作人员。”
佢仲话呢个速递员已经尽量唔影响其他人，斥该网民冇同理心：“你估如果佢有得舒舒服服坐喺餐厅入面食嘢，佢会唔会选择坐喺个垃圾桶旁边食呢个饭盒？人哋已经匿喺一个尽量唔影响其他人嘅地方，谂住嗱嗱声扒埋嗰两啖饭就继续送货送件，然后你影咗佢张相放上网谂住公审再去投诉，其实唔可以话你唔啱，你系有你嘅道理嘅，只不过成件事，好冇同理心，好唔善良。”
佢表示如果个速递员最后因投诉而被解雇，佢会帮对方搵工：“麻烦认识呢位速递哥哥嘅朋友叫佢联络我，我即刻安排一份工畀佢。”唔少圈中好友，包括有孙慧雪、陈敏之、陈自瑶等都有留言支持，觉得佢真系讲得好啱呀！
