张敬轩个唱超时认罚过百万 感激老板全力支持：对佢湿湿碎
歌手张敬轩昨晚（29日）终于完成26场红馆演唱会，全场high爆，5度encore卖力演出到凌晨1时零5分，歌迷久久不肯散去，扰攘接近20分钟才分批离开，相当热情。轩仔数度下跪衷心多谢歌迷爱戴，演唱会上更承诺将会成立基金帮助舞者追梦，甚至送他们出国深造，又透露有意于明年举行交响乐演唱会。
演唱会后他受访谈到成立舞者基金时坦言：“今次我个演唱会嘅dancers有好多要打3、4份工嚟追梦，而我觉得自己平日嘅使费其实唔多，应该攞啲出嚟帮助社会上有需要嘅人。（初步谂住攞几多钱出嚟？ ）我谂会7位数字，跟住会搞慈善筹款，又或者叫老板（杨受成）帮吓手，个基金一定唔会用我个名挂帅。”
至于今次演唱会表现，轩仔给予自己80分：“扣20分系因为一啲技术嘅问题。（都唔关你事？）但我觉得买飞入嚟睇演唱会嘅，应该每晚保持一定嘅水准。（听日谂住做乜？ ）我上紧NFT堂，同埋过两日我要开始拍广告嘞。”
对于尾场演唱会唱到凌晨1点，轩仔多次向记者表示抱歉，且坦承：“26场演唱会，罚款起码7位数，不过如果唔系红馆有限制，佢哋（粉丝）企几耐，我都会几耐，因为呢啲系爱。其实我都有打畀杨生讲唔好意思，呢啲对佢嚟讲湿湿碎啦，佢系一个应使得使嘅人，佢话冇嘢紧要得过支持者对我嘅support。依家嘅乐坛有新局面，我仲有咁多人支持，要珍惜。”
当被问到嘉宾众多，是否碌爆人情卡，轩仔答：“佢哋真系好锡我。我唔主张嘉宾送礼物，因为佢哋嚟已经系礼物，依家搞到个个都送，好似我荣休演唱会咁。（点报答佢哋？）以后两肋插刀，同埋会私底下约佢哋食饭。”
对于有指未有邀请视他为偶像的冼靖峰担任嘉宾，引起网民讨论，轩仔表示：“网上可以自由发表意见，粉丝嘅角度好单纯，净系想自己嘅偶像得到多啲嘅机会。佢有传短讯畀我，话呢几日嘅新闻希望冇影响到我，我就叫佢加油，可能将来有机会大家会合作。我谂佢哋同我啱啱入行一样，待人接物要多加磨练。”
