星岛网：陈展鹏拍《黯夜》中环街头丧跑 做咗老窦唔锡身起飞脚搏命打
陈展鹏最近在剧集《黯夜守护者》再演警察，展鹏形容今次角色「高辉」多年前曾做卧底，系个「hea吓hea吓」慨人，不过讲到查案依然好有火。演得警察难免有动作场面，不过《星岛头条》探班时，出名搏命的展鹏竟然笑指，今次好鬼轻松，因为「粗重嘢」留返畀前辈李成昌和黄柏文，睇真动作场面都唔少，但系对于拍惯动作戏慨展鹏嚟讲，全部只系碎料！采访：杜杜摄影：娱乐组
讲到今次角色，展鹏话好少做呢类不修边幅角色，都觉得几好玩，「角色系比较hea吓hea吓咁，头发又唔系点吹，好似睇化咗个世界，但系又未去到冇咗团火，只系好多嘢觉得呢个世界系咁㗎啦！」
做咗老窦都唔锡身
探班其中一场戏，讲展鹏追住陈炜戏中囝囝「俊仔」（杨凯博饰）由中环闹巿跑到去中环码头，因为读中四慨俊仔正值反叛期，跟妈咪关系好差，仲跟埋班古惑仔玩，展鹏好言相劝，点知「俊仔」为咗避展鹏宁愿选择跳海。虽然戏中两人都要跳海，但导演安排咗替身帮手，只系跑吓追吓人咁，对展鹏嚟讲绝对零难度啦！
至于另一场戏，就讲展鹏为救做卧底时跟过慨大佬李成昌同黄柏文，同班古惑仔大打出手，不过作为警察救人有枪帮手，打起上嚟都唔算太辛苦，反而李成昌同黄柏文啲打戏仲甘，黄柏文仲为展鹏挨咗一刀。展鹏就讲笑话：「动作慨嘢交畀啲前辈去做，畀晒成昌哥同柏文哥啰！哈哈！我主要系揸枪㗎嘛！就唔使咁多动作啦！」问到展鹏拍动作戏，会否因有了家庭做埋老窦会更加锡身，渠就好肯定话绝对唔会，「做嘢始终都要有个专业喺度，同埋基本上公司拍嘢都好安全。」
