陈山聪同姚子羚演床上动作戏：我好狼死！
艺人姚子羚与陈山聪今午（1日）现身荃湾，落力为主演TVB新剧《铁拳英雄》宣传造势，子羚与另一女主角唐诗咏齐齐以黑色杀手装登场，大晒事业线，监制文伟鸿笑言：“套剧咁耐都未出街，就系为咗整短啲女主角嘅事业线！”
子羚与山聪戏中再次“谈情”，山聪大爆子羚戏中不乏性感造型，子羚说：“经常着泰装，条裙有条拉链拉起方便对打。（唔担心走光？ ）有冇咁谂过，麻烦啲对手返屋企洗眼！”山聪则说：“佢哋贴晒胶纸嘅。（有眼福？）我同佢合作过咁多次，成日叫佢返入去着羽绒！”
戏中子羚拍打戏搞到瘀脚肿，与山聪感情线有离离合合，问到二人有否激咀或床戏，山聪搞笑说：“总之我好狼死，乜都有啲咁啦，当然包括动作戏，床上床下都系动作戏！（点激法？）睇吓咪知啰。”
感慨剧集竣工3年才推出
谈到竣工3年才推出，山聪感慨说：“我记得煞科翌日我就飞咗去巴黎影结婚相，依家囝囝都岁半，开始识得睇电视，终于等到同佢一齐欣赏自己作品。呢排我开电视见到预告片，囝囝都睇到定晒，好似明咁。”至于戏中另一演员李嘉传婚讯，子羚说：“我同佢由TVB8开始认识，恭喜佢搵到人生另一半，都戥佢开心，希望佢快啲返嚟帮手宣传。”
