同何雁诗嗌交！郑俊弘：最紧要识讲对唔住
艺人郑俊弘（Fred）在myTV SUPER灵异剧《凶宅清洁师》饰演“洪仔”洪逸曦，角色因一次玩碟仙后玩出祸，自此变得忧鬱，经常跌入“黑空间”，对此他坦言角色很沉重：“一起身就要开始培养情绪，但辛苦之中又好过瘾，因为未试过挑战情绪咁沉重嘅角色。”
讲到难忘戏份，他坦言是首次见到自己颓爆外表的那场戏：“喺的士望到自己嘅倒影，觉得自己好冇用就喊，嗰场要夹好Timing，由有阳光到入隧道黑晒，再望住自己嘅倒影，喺隧道内嘅时间又要喊，但因为塞车唔得，所以要等，又要Hold住情绪，如是次拍咗3次。”
而另一场就是在沙滩拍了几晚，他在水入面要游泳、浸亲及拉威吔。虽然今次体力及情绪上都辛苦，但他大赞洪永城及C君（郑诗君）等监制很好，整个团队很热血，毫无怨言。
他之前有段时间没有拍剧，但近年开始拍番剧，他坦言：“可能人大咗，演戏同心态上都唔同咗，同埋依家可以多啲角色搵我做，唔只做细佬。”
音乐方面他亦预告将签新公司及出歌，问到不跟太太何雁诗一起做独立歌手？他坦言虽然两人不时会合作做音乐，如他帮手弹结他及唱和音，但始终工作上想分开做，问到可是避免吵架？他即笑言：“有时都有拗撬，佢要求好高，我比较随便，有时同佢录音大家都忟忟哋，因为佢听啲音好准，我一走少少音佢就话再嚟，我就话差唔多啫，不过就唔会嗌大交。”
学识唔开心讲咗先
他续坦言二人会互相迁就，自己亦学识讲出心底感受及主动道歉，是认识太太后最大转变：“以前我收收埋埋，自己嬲就算，但咁多年沟通，学识唔开心讲咗先，同埋最紧要识讲对唔住，唔好自尊太强，大家一齐生活冇分你我。”
他亦坦言自己有时脾气大，全靠太太的爱令他“下火”：“有时我会忟自己，最近一次发忟憎系喺厨房磨咖啡豆，但整极都唔得，又赶时间，点知仲揿错掣搞到全个散晒，火都嚟，讲粗口闹同扔嘢，老婆即刻入嚟帮我搞，话我发忟憎都冇用，我都即刻冇事。”
场地：RISE Kitchen
