富二代戴A货？真人骚几成真 仲有边个系造假！
韩国真人骚《单身即地狱》搵嚟多位靓仔靓女做情侣配对，当中带挈24岁网红宋智雅极速上位，依家接Job量同人气已经直逼女团偶像，早前佢大方认系富二代更获网友赞坦白，点知网民发现佢多次着上及佩戴A货名牌衣饰，真实背景受质疑！但其实真人骚有几成真？真实身份有冇得隐瞒？睇嚟都要靠网友一双惠眼自行判断…
好似TVB音乐真人骚《声梦传奇》比赛入面，“清纯乖仔”冼靖峰（Archie）平时冇乜出声，以为佢系文静Type，原来佢好有料，学霸出身嘅佢中、小学就读名校喇沙小学及喇沙书院，之后升读香港大学，仲差啲做埋专业人士，佢为追歌手梦，更由200磅大肥仔丧减至依家标准身形，斋睇外形点知知呢啲嘢。加上佢系表演同选秀节目“常客”，做过《全民造星II》60强，一啲都唔系《星》入面咁内向。
ViuTV真人骚选秀《全民造星IV》令全港市民争睇女团盛况，依家喺是非之中生存嘅Ash（锺卓颖）就被节目捧做天籁之音，又力Sell佢系嫩版Angelababy，点知就被网友起底发现佢前年已经做咗人妻，暪婚参赛令网友幻想破灭之馀，最近佢仲疑似未正式离婚就同歌手张天赋（MC）因合拍MV挞着，平安夜孖咇行超市断正，人气真系冻过水。
唔好以为外国啲真人骚就会“真”啲，好似《璀璨帝国》（Bling Empire）咁，记录一班富豪名媛挥霍金钱嘅奢华生活，而节目入面角色设定扮穷、扮大乡里嘅爆肌男Kevin Kreider，就被发现真实身份原来系娱乐公司CEO，佢身家更高达1,900万美元（1.48亿港元）！但其实Kevin身世都好坎坷，韩国出生但被父母遗弃孤儿院，后来被白人夫妇收养定居于美国，大个操弗后更成为首位A&F半裸亚裔模特儿，仲做埋健美赛冠军。
