朱敏瀚余思霆疑冷战 成年冇见黑面同女友开餐
29岁的朱敏瀚年初夺得本届TVB最佳男配角，攞奖时漏咗多谢拍拖3年几的17年华姐女友余思霆，事后补镬喺访问多谢返对方，当时女友已经返咗台湾嘞，仲话虽然分隔两地都会互相支持。近年朱敏瀚备受公司重用，处于事业衝刺期的他坦言未有结婚打算。去年女方被公司派返家乡台湾拍旅游节目，由原定拍3个月最后拍咗成年都未拍完，朱敏瀚都话成年冇见女友好挂心！但日前余思霆快闪香港两周，本报撞到二人喺铜锣湾食晏，不过久别嘅两人唔见糖黐豆，仲似乎有啲拗撬。採访：梁志明
余思霆虽然不时在IG分享性感照，好似永远都在最佳状态咁，不过呢日见佢零装扮同男友出街，选美出身的她似乎有啲走样。而她与男友成年冇见，同枱食饭两个都黑口黑面，睇得出唔係倾啲咩开心话题囉！
都唔似拖友
朱敏瀚日前同女友余思霆喺铜锣湾一间茶餐厅食晏，睇嚟应该唔多肚饿，纯粹想搵个地方坐吓咁，事关两个人只係叫咗一碗麵，余思霆食咗两啖就推畀男友食。期间朱敏瀚听余思霆讲嘢都冇乜笑容，块面甚至愈听愈黑，之后索性揿电话。食完嘢歎埋杯嘢饮，朱敏瀚就攞咗女友部电话揿咗阵，又递部电话畀女友睇，又讨论咗一阵间。畀返部电话女友嗰阵，朱敏瀚拎多两秒都好似嫌重咁，作状想扔落枱玩女友，叫女友快啲接返部电话呀！
行街唔拖手
喺茶餐厅走人，朱敏瀚同余思霆全程都冇拖手，咁耐唔见点解好似唔多Sweet咁呢？之后二人倾住偈行到利园附近，余思霆就一早Call定车，一讲Bye就直接上车走人。而朱敏瀚就上咗利园三期，唉！咁耐冇见，女友先返嚟两星期，仲晒时间闹交，希望唔好影响佢哋感情啦。
