座驾被刮花！江嘉敏惨被闹番转头：啲人咁不负责任
TVB小花江嘉敏性格敢作敢为，佢寻日（15日）喺社交网话自己架车被人撞到刮花咗，留言：“其实架车伤得唔太严重，但系去车房整都要3、4千蚊。”出名唔怕事嘅佢由于联络唔到撞花佢架车嘅车主，咁就主动放纸条同对方联络，点知反而被停车场管理员闹番转头：“车主叫我同你讲‘报警啰！惊你啊！”搞到江嘉敏好唔开心大受委屈：“我觉得就算系有心定无意，刮花咗就系刮花咗，咁样都算系一个交通意外，唔应该因为见到大厦停车场冇CCTV，见到我架车冇后Cam就心存侥幸。”
佢出Post之后好多网友都问佢有冇事，佢就同大家报平安：“大家放心，人安全冇事。”不过佢就慨叹唔明点解啲人可以咁不负责任：“做咗错事冇人见到冇人影到，冇CCTV影到就当自己冇做！”
佢仲讲番以前都试过见到喺街见到有人泊车嗰阵，唔小心撞到前面架车之后打算不顾而去，佢即刻上前阻止唔畀对方走，仲同对方讲道理：“唔系花咗少少嘅问题，咁你始终都系撞到人哋架车，点可以不顾而去？今次好彩就系撞到架冇人嘅车，咁如果下次唔小心撞到只狗撞到个人，咁啱附近冇人见到，你系咪又会就咁走咗去？”不过佢都明白有好多人会觉得佢太多事，但系佢觉得自己冇做错：“起码我觉得自己做咗一样啱嘅事。”
