姚子羚恶搞相被眼科诊所抽水宣传 网民嬲爆：好唔尊重
姚子羚（Elaine）唔经唔觉已经41岁，但依家仍然Keep住样靓身材正，相当犀利。不过Elaine因出道时眼细细，曾被网民恶搞改图，将佢喺剧中讲“表哥”一幕嘅眼睛，P成豆豉咁细粒，因而有“表哥”呢个花名。
而近日就有一间曾经与多名TVB艺人合作嘅眼科诊所，用咗Elaine嘅改图相喺社交网做宣传，仲喺贴文抽水咁话：“眼够大先可以做矫视？擘大眼呀表哥！姚表哥咁样！如有类同，实属巧合。”虽然图片已打格，但仍然睇得出喺Elaine嘅改图照。而网民见相后即刻嬲爆狠批，认为该诊所嘅宣传手法有问题，对Elaine极唔尊重，引发公关灾难！
去到昨日（20日）该眼科诊所喺社交网发出道歉声明，写到：“就较早前贴文中不恰当使用姚子羚小姐的相片和措词，对姚小姐所造成的不便，以及对公众造成影响，深表歉意。我们已与姚子羚小姐本人联络及表达最深切的歉意，姚小姐亦已接受了我们的道歉。”不过该贴文冇耐就被删除。
