夏雨暂居墨西哥化身KOL行街市 赞当地海鲜坚抵到烂
75岁嘅夏雨近年好少现身幕前，佢原来离开香港去咗墨西哥呀！佢早前现身墨西哥边境城市蒂华纳，仲化身KOL拍片介绍当地嘅美食同风土人情等，佢交代近况话：“我依家决定留咗喺度，拍一个好详细介绍蒂华纳嘅特辑，我逐样逐样介绍畀大家。”
佢除咗带大家喺当地饮珍珠奶茶之外，仲去咗行街市，参观卖杂货嘅跳蚤市场同埋海鲜市场，佢大赞当地嘅物价好低，买一大只象拔蚌只需4蚊美元（约31港元），蓝鳍吞拿鱼只系10蚊（78港元）1kg，而买劲大个石斑鱼头只系30美元（约235港元）咋，真系抵到烂喎，唔少网民睇见都话移居当地有得谂喎！
其实蒂华纳系墨西哥西北边境城市，同美国圣地牙哥相邻，两地只有一墙之隔，夏雨有拍片介绍边境墙，期间仲意外目睹有人喺墨西哥穿过边境偷渡去美国嘅过程添，可以话系够晒爆呀！但只系新手KOL嘅夏雨可能宣传未做到足嘅关系，佢嘅网上平台粉丝人数唔系好多，睇嚟要吸多啲人气真系要加把劲啦！
