招牌齐阴都搞唔掂 炎明熹竟然同广州雄狮撞样
“人气王”炎明熹（Gigi）最近喺由TVB与芒果TV合制嘅节目《声生不息》中威到尽，佢更凭个招牌齐阴头，被网友封为“火星妹妹”，估唔到佢呢个独特嘅造型都会撞样，不过今次佢唔系同人撞样，而系同广州一个动物园入面只雄性狮子“杭杭”撞样！
本身已经系“网红”嘅杭杭，就出名成日都有唔同“发型”，当中佢就试过“中间分界”，近日网上流传佢嘅“齐阴”新相，当中动物园发言人就表示冇人帮狮子修剪，可能系因为广州天气比较潮湿，令雄狮鬃毛乾完湿、湿完又乾所致。唔少网友就惊讶发现，原来炎明熹同杭杭竟然系咁似样，加上炎明熹平日Cool到爆嘅表情，佢两个简直一模一样，唔知炎明熹知道之后，会开心定嬲猪呢？
