星岛网：独家丨赵希洛狂掴陈山聪面都红晒 “御用癫婆”惊喜玩诡异获讚
有TVB“御用癫婆”之称嘅赵希洛喺TVB剧集《十八年后的终极告白2.0》再度“发功”，演技获讚。她预言好戏在后头，稍后剧情会更激，除咗有激动牀戏外，仲会狂掴陈山聪嚟洩愤，赵希洛首次玩真打紧张到不得了，但好感激呢位好拍档嘅信任及力撑：“佢好抵得谂，係抵讚嘅。”採访：方骞平 摄影：林建安
剧中刚小产的赵希洛知道老公陈山聪与谭凯琪搞婚外情，双重夹击下大报复，一秒变奸，诡异嘅眼神加上阴险笑容，被网民大讚“疯狂DNA”回归了。她既惊又喜：“可能大家锺意我做某一类型嘅角色啦，但我都冇谂过竟然有咁多人留意我，呢啲评语每个演员都锺意听到，唯一担心会被定型，之后被困喺某啲角色上。”
打完个心唔舒服
赵希洛认为，《十八年后》最难应付係有场要真打陈山聪嘅戏：“原先剧本冇呢场戏，但睇完剧本，Joyce(角色)当时谷到爆好需要发洩，我同监制要求加返场掌掴戏落去，山聪听到都一口答应。以前分别借位打过邝洁楹及李施嬅，但今次首次打落人哋块面，虽然有避开掴到佢耳骨，但进入状态太投入时都会打错位，仲要补镜位打咗两次，每次都大大力打到啪啪声，山聪面都红晒，真係唔好意思，始终被打嗰个都唔好受。”
