星岛网：魏浚笙招积仔上身被洪嘉豪杨天宇爆笑反击
激赞轩公如多啦A梦山旮旯拍戏要乜有乜
魏浚笙（Jeffrey）、洪嘉豪（Kaho）同杨天宇（Angus）首度合作贺岁片《超神经械劫案下》，因大家有童真又够癫，好快成为老友。提到戏中三人都有好多新尝试，又要除衫骚肌同露股，又有打斗场面，他们边讲边互窒，Kaho同Angus睇唔过眼Jeffrey认叻，联手夹击渠。不过讲到前辈张敬轩（轩公），三人都变得好恭敬，仲大赞轩公工作态度认真外，真身其实系多啦A梦！
三人在戏中都有好多新尝试，所以拍摄过程相当难忘，Kaho说：「好好彩，同Jeffrey叫做第一套戏试咗好多嘢，又打交，又开枪同吊威哋。」Angus开拍前被导演要求操到《变形侠医》咁大只，「我话『吓！打类固醇就得，好难㗎喎！』因为我嗰时拍紧另一套戏，接住拍呢套戏，短时间内好难，同埋亚洲人体质要变《变形侠医》喎！我尽量大只，不过套戏只系成日着背心露手臂，得一幕系除衫仲要得嗰两秒。」
Angus赞Jeffrey坚揪得
戏中Jeffrey除了要骚肌外，仲要为动作场面勤练武功，「练功比较花心思，因为一个唔小心，一拳冲落去，如果你避得唔正确就会真系食咗，事前准备都做得好够。」听到平时经常认叻的Jeffrey，答唔识打要专登去学，Kaho冷笑一声：「竟然答唔识！」而Angus亦帮口，「原来佢好有天份，拍完先知自己识啰！即系天生识嗰啲。」Kaho再加多脚，「差在渠任督二脉未俾人打通。」呢个时候Jeffrey再现本性，「师傅教一招，我就耍到出嚟！」
另外跟Jeffrey对打的Angus都承认他坚揪得，「渠真系劲，冇谂过渠会打得伤我，条友好大只㗎！」Jeffrey尴尬得嚟亦不忘认叻，「唉！有时真系拳头无眼，为求个认真程度，真系要劲嘛！杨前辈武功都厉害，因为渠本身都有玩开，打斗方面经验比我丰富，系强慨对手。畀个《变形侠医》赞大只，真系有少少羞耻，渠嗰种大只系有少少黐线，系比赛嗰只健美佬嚟，真系甘拜下风。」
讲讲吓，Jeffrey再拉埋Kaho落水，「其实豪哥都揪得，差在冇得畀佢发挥。」Angus更笑指Kaho在戏中超挨得打，「渠成日畀人打，但系都死唔去㗎！渠呢吓劲嘛！我有一幕成个锤仔爆佢个头，渠都冇事，劲呀！学唔到渠。」Kaho就自爆虽然不用骚肌却另有任务，「当然渠两位系大只除衫，但系唔好忘记，我喺呢套戏系除过裤慨，因为我要去厕所就除裤，故事就系咁发生。」Jeffrey笑他，「你大只除衫，我大抽咪除裤啰！哈哈！」Kaho无咁好气话：「我系唔够大只，我咪除裤啰！」
轩公从不呻辛苦
三人互寸一轮后，一讲跟轩公合作即变得好恭敬。被轩公视为细佬的Kaho首次在戏剧上跟大佬合作，一样赞不绝口，「佢好认真，比我哋更加钻研得深，有时我哋都收货，渠会话仲可以点样再好啲，好坦白讲我30岁拍呢套嘢都觉得辛苦、吃力，我私底下都有问渠哋（Jeffrey及Angus），系咪因为我老先至觉得辛苦，渠哋都话觉得好辛苦，但系我未听过轩公讲一句辛苦，渠系主角嚟，我就算call得早9点到，渠已经拍完几场，呢个真系佩服。」
早前先冧完黄德斌的Jeffrey，今次又俾轩公冧到，「我发掘到轩公有颗童真慨心，佢好善良，好好慨人，真系very good，顶瓜瓜。」问到轩公好在那？Jeffrey继续卖口乖，「不如讲唔好慨位，系冇慨，所以好慨位系全部，简直系完美。」不过究意德斌兄好定系轩公正呢？Jeffrey世界仔上身，「两个都系十分之体贴后辈慨人嚟，都好好。（以为你变咗心？）唔会啦！好人唔会得一个嘛！全世界都有好人。」
Angus就透露轩公除了镜头前认真，镜头后亦相当细心，「渠系超级温暖，好识关心人，我有场戏整伤咗只手，渠见我喺度敷冰唔出声，渠走埋嚟问我有冇事，我印象中佢好似多啦A梦咁，可以喺半个钟就搵到啲嘢畀你，渠可以搵到支活络油，又搵到一排止痛药，但系我哋嗰时喺山旮旯拍喎！跟住有个演员把声沙咗，渠又可以搵到啲清音丸，仲要渠畀完你后，下次仲会问你有冇事啰！渠系真系关心你先至会咁做，好上心！」
