星岛网：周吉佩多谢网民负评想做曾志伟爱驹 最穷户口得两位数要问旧爱借钱
周吉佩(吉吉)以“死唔断气”精神，在《中年好声音登峯之战》胜出。被指爆冷夺冠的他，形容自己似足去年澳门打毗赛，曾志伟爱驹“不醉无归”从后居上赢马的状况，吉吉坦言想成为志伟嘅爱驹：“我成世人都係喺落后位置，多谢志伟哥举办《中年好声音》节目，令我有追上嚟嘅机会。”
採访：方骞平 摄影：谭志光
周吉佩在比赛当晚分数由头带到尾最后Win埋，他觉得难以置信及好梦幻，又指之前有几round失准得好紧要，甚至冇晒信心，连自己都觉得foul硬：“做乜啫，唱到咁？”他答得老实称自己赢在侥倖，正如前辈所讲，比赛如跑马，状态好紧要，他志在参与一个party，豁出去之后反而有超水准表现。
对于TVB总经理曾志伟为他平反“造马疑云”，吉吉称他对6强都好好，更称志伟的爱驹“不醉无归”好似自己：“喺志伟哥70大寿生日会上，重温去年‘不醉无归’参加澳门打毗赛嘅精彩片段，片中‘不醉无归’曾转弯失蹄以致失位，但去到直路修正仍以超级姿态赢马，而我今次亦唔信自己会跑赢，以为自己排最后，原来真係有爆冷嘅可能性，亦希望大家睇到我嘅实力。”
“死唔断气”难听过粗口
36岁嘅吉吉追梦星途大起大落，2007年22岁时参加有线《线动真音乐全港公开赛》夺得亚军受力捧，参赛后第二年就推出EP，以为从此有运行原来是“一碟歌手”，死心不息的他跟朋友组乐队sp’ACE。入行15年来受过唔少白眼，连公司reception都睇佢唔起：“我得奖时佢哋有同我打招呼，离开公司嗰日，当唔识我，嗰刻明白到Nobody係唔会得到尊重。”歌星梦碎后令他经历一段黑暗日子，“惯咗做‘明星’成日搭的士出入，最燶时银行得返60几蚊，要搵前女友赊住一百蚊，冇钱惟有颓喺屋企，嫲嫲、爷爷见我冇工开都好担心，真係连自己都睇唔起自己。”
至于最委屈，莫过于网民用粗口闹他，“话我係奀星都叫识得我，见我再组乐队，话我‘死唔断气’、‘要红都红咗啦。’真係难听过粗口”，不过经历过谷底生活的吉吉坦言“如果唔係有咁嘅经歴，可能仲係好颓，又真係死唔断气先有今日，所以做人真係要争气，要坚持。”谂通晒的他更会记住所有负评，“唔係记仇，会记住闹我嘅不足，咪做好啲我嘅嘢，用行动回报评论，亦可以成为小朋友教材，真係要多谢当日话我死唔断气嘅网民。”
曾获谭咏麟赠言要斗长命
人生重现光彩的吉吉好感激谭咏麟当年嘅鼓励：“当日喺有线大厦我送过唱片畀佢，佢讚我把声几好，叫我加油，之后喺黎瑞恩红馆后台又相遇，校长对我有印象，叮嘱我‘呢行係斗长命，唔好放弃’。校长嘅格言，好听係斗长命，其实同样係带出死唔断气另一个意义；至于黎瑞恩不单当年畀机会sp’ACE做佢红馆个唱表演嘉宾，仲教我要饮水思源及谦虚。”吉吉坦言唔知呢次会唔会係‘虚火’，可能好似当年一样转头落返嚟，经验之谈叫佢唔好谂得太长远，一步步行做好𠵱家先。
