星岛：唐诗咏自揭人生错晒：细个只关心有冇钱 孟加拉探访童婚女孩反思扭曲童年
爱猫刚离世的唐诗咏早前获国际培幼会（香港）邀请，到孟加拉首都达卡及偏远的古里格拉姆县，探访一班受童婚影响的女孩及家庭。此行令她有好大得著，觉得香港人应该去当地感受下，又令她反思童年因父母离异令思想变得扭曲，价值观错晒，以为有钱就可以令家庭变回完整，一早放弃读书，所以她希望透过自身经历，向小朋友分享不要转牛角尖。採访：杜杜 摄影：谭志光
探访时的女孩表现，更令诗咏思考很多，“我喺佢哋10几岁年纪，都唔知自己想做咩，但佢哋已经想做医生、法官、军人、警察，有个想做科学家研发癌症药物，每个嘅愿景去到好远，同埋佢哋都好大爱，想做嘅职业都係想帮人，知道知识可以改变命运，个个都好想读书。”
诗咏认为她们面对逆境的积极乐观，香港人都应去感受一下，“有小朋友一定要带佢哋去睇，感受吓自己有几幸福，佢哋生活环境係差到好难改变，但佢哋仍拥有希望，内心好强大，身边啲人少少事就唔开心，不如你望吓人哋先啦！”
诗咏承认当年因没人提醒她，所以现在好想将自己亲身经历跟小朋友分享，“细个屋企有好多变化，冇家长话畀我听，好真实发生紧咩事，所有嘢都係我去谂去估计，去完呢个旅程，发觉佢哋家庭好团结，互相支持同包容，同我𠵱家想做嘅project一样，小朋友可能细个时遇到困难，我哋尽快去帮佢谂通，唔好入咗个牛角尖。”她想将这个想法放在未来的创作上，“之前做咗个动画片，想将佢变成好多唔同嘅嘢，可以出书，或者发展成舞台剧、短片，希望有更加多可能。”
离开TVB刚好1年，诗咏好享受现在有更多me time的生活模式，除了食中药调理身体，还上堂学了很多东西。而完成这次探访后，她希望未来能做更多慈善工作，她开心粉丝很知道她心意，“以前搞圣诞聚会，但𠵱家我哋会做义工、探访老人家，好开心我冇特别要求，咁啱大家会有呢个谂法，我想继续开呢度门，将我嘅睇法传播出去。”
至于演艺工作，诗咏坦认以往角色大同小异，离开后出现转变，“搵我做嘅角色好唔同，好想畀多啲人睇，我自己都唔知嘅嘢。”她更想挑战拍综艺，“以前我好怕，因为冇剧本，我不嬲跟住剧本走，呢个moment都想试吓。”
