汤洛雯爆马国明四十几岁人唔识用洗衣机：可能之前忙又同屋企人住 | 香港01
汤洛雯（27/11）现身中环出席“新婚生活易大赏2023”颁奖礼。提到日前未婚夫马国明出席活动大呻举办婚礼酒席开支大，需要靠搲捞减轻负担，亦不介意以夫妻档搵钱。
汤洛雯受访时笑言：“其实佢係唔放弃任何一个机会去宣传，不过讲真搞婚礼係会用好多钱，咁所以喺财务方面，我都係尽量去悭住用，尽量将个价钱压制住，咁所以我係一个师奶嚟，变咗有好多项目上，我都会讲价，问对方可唔可以平啲。”
被问到婚后会否紧接住度蜜月？汤洛雯表示：“其实我就好想嘅，但我就未有时间计划，因为近来好多人疯狂去旅行，变咗如果先去一个好特别嘅旅行，就要早半年时间去准备。不过我都有睇过啲行程，而马明佢又好有心，佢记得我之前讲过度蜜月话想睇北极光，因为我觉得睇北极光，大家係有缘份先可以一齐睇到。变咗我睇到如果要去嘅话，都要等到下年嘅年尾，就令我暂时打消咗呢个念头，唯有之后再谂。”
提到马国明自动波帮手处理家头细务，婚前预演好老公角色。汤洛雯笑言：“其实佢喺屋企大事小务佢都会做，除咗帮手洗碗之外，仲帮手洗衫。其实佢而家係好犀利，因为一开始佢认识佢时，由佢唔做做呢啲嘢，但到而家佢係要自己处理，可能佢同住我一齐，佢係要焗住做，变咗佢冇办法，哈哈！因为有啲衫唔可以落机洗，变咗而家佢洗衫係叻，同埋之前佢可能好忙，又同屋企人住，咁所以之前佢係唔识用洗衣机，但而家佢係识部洗衣机洗衫。”
