明报：文颂男完成5次化疗无成效 肿瘤变大获安排转做电疗
TVBJ2台节目《不正常爱情研究所》主持文颂男（Koba），去年10月患上罕见癌症“尤文氏肉瘤”，完成首阶段的第5次化疗后再检查，却发现治疗无效，令他非常无奈及害怕。
Koba今日在社交平台撰文抒发感受︰“经历咗第一阶段嘅治疗，做咗五次嘅化疗，但係治疗无效。照咗磁力共振，发现个肿瘤唔单止冇缩细，仲变大咗少少。喺呢个时间点，我想分享少少自己嘅真实想法同感受。”
“做咗五次化疗，每一次都好似经历生死，肉体上好难受好辛苦，而且所有毛髮都甩晒，个样好似妖怪咁，到后期仲开始痛番。我真係觉得好无奈，好似咁辛苦但係完全冇意义。另一方面，到真正听到医生话：‘个治疗冇乜效果、个肿瘤仲要大咗少少，最后一次化疗都唔好做喇，准备做电疗啦’嘅时候，我心情喺嗰刻好似跌咗落深渊。同时，我真係好惊，感觉距离死亡又近咗一步，而且可能唔係死咁简单，係会死得好痛苦，因为我嘅下肢 、盆骨附近嘅位置係越嚟越痛，痛到开始连吗啡都冇办法纾缓到，身体仲会不自觉抽搐，有啲身体部位已经变得麻木，排泄方面都开始出现好多问题（呢部分太羞耻都唔想讲太多），我开始有种感觉係‘我活得好冇尊严，因为行动不便、痛，每日都係喺屋企对住四埲牆，几乎零社交、零工作，每日都活得好似好无意义咁。我成日都好惊，我真係好惊，好惊，好惊可能临死前会半身不遂、全身插满喉管、无时无刻都伴随住巨大嘅痛楚、意识唔清醒又表达唔到自己。”
“捱咗咁耐、咁辛苦、无一刻可以放鬆，有时唔知为咗乜嘢。我咁大个人，都未活得轻鬆过。由细到大都遇到唔同难关同挑战，就算每次嘅挑战都越嚟越困难，但我都靠自己一一跨越过，但个天就好似好想我死咁，唔肯放过我，唔想畀我轻鬆。喺我以为终于生活可以稳定啲嘅时候，又畀咗呢一个难关我，而今次我觉得我真係控制唔到，冇办法靠自己去解决。就算我想放弃，但其实根本唔知可以点放弃。我未死嘅话，我只能够选择坚持。依家我每日都痛、非常痛，无一刻唔痛，每日度日如年，我唔知几时可以开始电疗、几时先可以纾缓到我嘅痛楚，我只係盼望可以快啲唔痛。我真係觉得好攰、好攰、真係好攰。”
Koba虽然辛苦和害怕，但强调仍然会很努力地对抗病魔，没胃口仍会强迫自己进食，几痛都会迫自己郁动。他续说︰“我谂好多癌症病人即使表现得有几坚强、几乐观都好，都会有我以上类似嘅谂法。但会咁样谂唔代表我放弃，我仍然好努力对抗呢个病，即使几唔想食嘢，都迫自己食；即使几痛都好，都迫自己要郁吓，唔好畀啲肌肉退化得咁劲。呢段时间虽然我喊好多，但喺可以笑嘅时候，我放声笑；想讲咩嘅时候，尽情去讲，唔会再收收埋埋，因为有啲嘢，依家唔做，以后唔知仲有冇机会做，唔谂咁多未来，活在当下，享受依家仲有嘅嘢。我仍然好热爱我嘅拍摄、演出工作。好希望有一日可以康复、行动自如，可以继续番呢啲工作。亦都好想继续可以留喺我爱嘅人身边、我嘅朋友、家人。我多谢我嘅家人、朋友、我最爱嘅好兄弟、老闆、同事同喺网络上唔认识但默默打气嘅所有人，你哋一直支持我、照顾我、体谅我。我爱你哋，我好唔想离开你哋。”
