车保罗历破产杂工、消毒员都要做 匿喺皇巴食足2年自热饭｜专访1
车保罗2022年登上内地综艺节目《无限超越班》，只用了短短三日的时间，成功将他的演艺事业由黄昏变成如日方中。这样说可能太夸张，但入行超过40年的他，现时的确经常有工作北上，比起当年曾经历破产，连妈妈下葬都要靠别人捐钱，又试过欠租被业主赶走，做消毒员食足2年自热饭，的确轻鬆不少。
从丽的开始败坏名声
为甚麽车保罗会沦落到这个地步？一切都要由他初入行在丽的电视说起。当年车保罗原来犯过不少错，导致最后无人再敢找他开工，他说：“其实有前因有后果嘅，咁点解会咁呢？迟到、失踪、唔到，演艺界呢行嘅大忌我全部犯晒。嗰阵时后生，未有咁靓嘅电话系统，而家我哋嘅电话有日记㗎嘛，你可以有啲编排摆晒入去。咁嗰时阵冇，我钟意写纸仔，咁啱你嗰日纸仔唔见咗呢，你係以为好似係有啲嘢喎，但係，即係点呢？冇啦！由丽的开始，我已经犯咗呢个错误啦，所以一传十十传百，有边个肯搵你呢？”
欠租多月做租霸被业主赶走
最后，他因为无钱，更去到被业主迫走的地步。“开始无乜人搵我做嘢，咁冇人搵你做嘢，你个仓有几多货呢？係嘛，咁真係几吃紧嘅，咁第一租开始交唔到啦，咁咪同个业主讲话争住多少先啦，我可能下个月畀到你呢？”他指虽然过到业主，但电费水费都要交，交到水费时，电就因欠款被停了，唯有找朋友借钱开电。车保罗续说：“到业主，你争我哋三个月喇喎，我话係呀！真係窄窄地，通融多个月啦，咁佢睇到你好似有少少似租霸，咁每晚点整你呢？整到你走呢？佢攞个电鑽，就冇鑽咀嘅，咁搵个四方盒，即係一个框啦，将个电鑽咁样栋咗落去，搵个铁嘅盒罩住佢，即係佢脚趾碰到就，哗！突然间你瞓紧觉上面有嘢鑽，鑽你天花板，你天花板有嘢栋落嚟，咁你点瞓，每晚係咁折磨你。”
最后，车保罗终于要搬离这个地方。
TVB开2千蚊续约 不如返元朗吔蕉
离开丽的后，车保罗在电影界其实有工开，不过当然并不多。直到1997年，车保罗加入无綫（TVB）开始稳定下来，但只做了六年时间便走人，全因为一份合约。“TVB任何人走呢，因为合同完咗嘛，佢咪叫你返嚟。你一返去呢，人事部又攞计数机啊，又攞唔知咩啦！好似判官咁，就押住你去你个Locker度，清Locker！明嘅，应该架嘛。咁我做晒手续啦，跟住‘嗱我得啦搞掂啦，预备出粮啦？’你唔好咁劳气，可能有份约你有兴趣呢？咦唔係话合同完咗叫我执嘢走，点解仲有约嘅？呢个係我哋度身订造，就係2千蚊一年。我话咁呀？一听2千蚊年已经，算啦，都唔使谂咁，你再讲乜嘢都好啦，我都係唔会考虑，我话我点生活？根本无得生活，咁不如咩喇，我返元朗吔蕉照好过啦，係嘛？所以由嗰下一出，我就即刻搵嘢做，已经係勒定肚皮㗎啦！”
争30多万卡数走上破产之路
离开TVB之后，车保罗在演艺界的工作屈指可数，辗转之间去到保险行业，亦为他破产埋下伏笔。“破产…破产都几係嘢，破产係好无奈嘅，我做咗好多行业，我破产係喺我做保险时，咁我保险最后我去咗纽约人寿，亦都无咗啦呢间嘢，因为使钱使得太犀利啦，咁十个盖得九个冚到，一个冚唔到，你啲运。咁我到最后谂一谂，冇办法啦，你冇得走，尤其是我哋呢啲所谓叫艺人係嘛，你要面对。咁我点面对呢？还又还唔到，嘢就冇嘢做，咁终于唯有咁啦，即係破啦！”
做保险做到破产，全因车保罗用了一种错误的观念，“因为我惯咗卖保险呢，我係约啲客去卡拉OK，基本上都係ok架喇，即係倾完喇，今晚我地继续，玩惯咗呢个游戏，变咗就唔觉呀！就算唔成功都无所谓啦！碌卡咋嘛，喂碌完你还到嗰个月开始，你已经係利叠利，係吓死人嘅，终于自己中晒啦全部。”当时利叠利滚到欠30多万的卡数。
妈妈下葬靠TVB好心人帮忙
正值破产时期，妈妈突然过身，车保罗身无分文，连帮妈妈下葬的钱也相当头痕。“好彩我仲有一个老友曾sir，就係无綫里面嘅公关总监，咁都识咗几廿十年，佢都帮咗我好大嘅忙。佢话TVB有个无名氏，就捐几万蚊，你去执你呀妈啦！咁佢仲亲自将啲钱送入嚟元朗畀我，我好过意唔去，好窝心。我话曾sir，我欠你嘅，今日我还唔到，但他朝你需要我做咩嘅，第一时间会到，因为受人因果千年记，阿妈走自己冇本事，已经係失礼。而你老人家，唔好理佢真定假啦，TVB有无名氏咁，咁有人开玩笑同我讲啦，会唔会係方小姐呀？係喎，我妈曾经同我讲过佢同方小姐打过牌喎，可能係呀！咁其实冇乜所谓啦！”
做消毒员匿喺皇巴食足2年自热饭
在往后十多年，车保罗做过很多工作，有地盘杂工、博爱杂工等等，不过讲到大家最印象深刻，应该是方舱消毒员，当年更因此登上娱乐新闻。“去食环署帮手啊，跟住又去咗落马洲边境，边境嗰时呢，我又去咗边度呢？呢世人都唔会去㗎嗰个位，就叫做沙头角，中英街，我守咗一个礼拜，咁点解呢？因为嗰度啲人全部中晒招，冇人敢去，咁上面都答应如果你帮我一个礼拜，一个礼拜后我畀个靓位，YES！咁嗰时我喺呢个叫中海物业吖嘛，佢承包咗，咁一完咗中英街呢，我就调咗去洪水桥方舱，就做，大家明白消毒员，最危险。”
他续说：“如果你件衫爤咗，个个都当你怪物，即刻隔离，跟住验验验，哦冇，你好嘢，我真係好嘢，嗰度几耐？嗰度2年嘞，四针，未阳过，托赖托赖。咁就係你个人嗰个操守问题，我收工，佢哋话我哋有落场时间嘅，咁落场我係唔会同任何人坐埋一齐嘅，係一个人。”
家中有大有细，当时正值疫情高峰，的确非常担心自己会将病毒带回家，但车保罗有自己独特的保命招数。“落马洲我哋先讲落马洲，皇巴由内地嚟香港落车嗰个位开始，跟住你过哂所有检查啦，出返去上返皇巴，我就匿埋喺皇巴嗰边，一无嘢做我就去过去一个人坐，哪怕食饭又好乜都好，所以我食咗2年几嗰个叫咩饭？自热饭，有米就倒落去，有所谓嘅肉倒落，跟住一倒冻水落个底，咁咪有少少冻水煮饭吖嘛，自热吖嘛，咁掉包白英泥落去，佢自己‘嘭嘭嘭嘭嘭嘭’，咁我就有新鲜嘅饭食，食咗2年零3个月，个样都似自热饭！”
