星岛：刘威煌终于识做人：藐我都会讲多谢 古淖文经常叫佢“常威”唔再嬲
第一届《超级巨声》第5名的刘威煌，相隔15年再战TVB《中年好声音2》，虽然8强止步，但觉得比赛过程有得着更为重要。威煌分享由当年自我膨胀的巨星心态，变返只係锺意唱歌的小歌手心路历程，就算被古淖文叫他曾经好嬲猪嘅花名“常威”，他反而觉得有亲切感，心态大不同。
採访：方骞平 摄影：邓国良 场地：Suger K
《中音2》后有更多人认识刘威煌，受欢迎程度劲过当年，笑言有啲似《超级巨声》感觉，不过，他唔再飘飘然，心态已调节返做个普通人：“以前唔识表达，见到人哋热情打招呼会好惊好尴尬，仲会谂多咗，质疑对方来意；𠵱家个人好‘地’(贴)，不论支持定藐我都会讲句‘多谢’，至少有留意过我；另外帮过我嘅所有人都要道谢。”
澄清冇被伍仲衡关照
刘威煌歌唱事业曾大起大跌，最后经不起舆论压力，7年前唱完怨念歌《灰狗》后打算全面放弃唱歌，直至疫情期间开Live再唱：“当年最介意係批评我个样似电影《九品芝麻官》嘅奸角‘常威’(邹兆龙)，但𠵱家觉得邹兆龙都几高大靓仔呀！参赛时古淖文用‘常威’个名嚟笑我，我反而觉得係老朋友称呼。今次都有负评指我同伍仲衡係buddy，所以先行到8强。我想讲伍sir畀我係标准以下嘅15/16分，事实摆在眼前，我冇要求攞过同情分，即使参赛期间一齐食饭都共识唔合照，甚至唔提任何比赛话题，就算係点老友，佢冇必要因为刘威煌而搞衰自己，而我就孭住造马罪名，咁会变成双输。”
已签TVB歌星约的刘威煌认为今次係缘份令他再有唱歌机会，畀面嘅可以当他歌手，其实自己只係一个热爱唱歌嘅普通人：“所以啱啱出嘅新歌《普通人》係唱出呢15年来嘅心声，林夕嘅词真係好劲，首歌係讲每个人都有自己岗位，我冇高过人，但绝对冇比人低，做人唔好贬低及自我膨胀。”
