星岛：方力申激爱女友叶萱甜讚6大优点 拍拖年半有心有力拒奉子成婚
方力申(Alex)于《逆天奇案2》中饰演的天才生物学教授，事事讲科学理论，甚至觉得爱情都係假，不过真身就刚相反，Alex认真对待每段感情，对于女友叶萱（Maple）曾勇敢公开被韩国邪教教主性侵，两人恋情一直不被睇好，不过拍拖年多的小方越嚟越爱女友更激讚对方：“佢对物质冇乜要求，朴素简单好容易满足。”更开心自爆父母都好锺意女友，睇嚟好事近。
採访：方骞平 摄影：朱伟彦 化妆：Elaw Wong@ The Look Studio 髮型： Kin Tam@ ILCoplo
《逆天2》的小方，细细个就被父亲带到荒岛做科研，内心好孤单，小方表示演绎方法，全靠代入感：“似小时候被爸爸安排喺美国练水一样，辛苦到边游边喊。”
唔搵小方演出係你损失
小方拍《逆天2》有好大得著及感受：“疫情后开返工，剧中有大量专业术语，但总监制刘家豪作风係冇得改对白，而且佢对我有好大期望，我喺4、5个月拍摄期内做好功课，又要减肥配合书生人设。原来命运安排我打好个基础，拍剧挞翻著副偈后，再跟张可坚拍住做2人舞台剧《相约星期二》能得心应手，攞返个自信。”
小方坦言疫情令工作及收入大减曾怀疑人生，“自己係一个乜嘢演员呢？”及“有冇入错行？”𠵱家有返自我肯定的价值：“通过努力，证明有付出係会做得到嘅，我係称职演员，对得住份职业，唔搵我係你嘅损失！”
共同兴趣睇画行博物馆
最近小方举家游日本贺母亲70岁大寿，虽然唔愿透露女友叶萱有否同行，但就自爆两人有过甜蜜旅程：“之前我同佢曾秘密外游，佢唔锺意行百货公司及名店，搞到我都冇买嘢，就算朋友代订推介餐厅，佢都话唔好，‘边行边食就算。’”小方对叶萱讚不停：“佢对物质冇乜要求，朴素简单好容易满足，呢个係我欣赏佢嘅地方，因为自己都係好简单嘅人，我哋经常去茶餐厅饮奶茶。”
因为叶萱的简单令小方另眼相看：“喺呢行咁多年，冇认识一个咁嘅人，(係咪会加分？)係好啱我，因为我哋好夹，哈…尤其係佢唔使钱，我冇钱可以使，我哋嘅共同兴趣係睇画展及参观博物馆。”
44岁有心有力父母催婚
另外，44岁的小方月前在《世界先进游泳锦标赛》分别夺得银牌及铜牌，追问会否衬有心有力之年成家立室？他带点尴尬笑说：“咁唔止得呢几年(有心有力)，可以去到好长时间嘅，顺其自然啦，我心中有plan，讲出嚟就冇惊喜啦，但放心，我唔会奉子成婚，(咁安全㗎咩？)咁样唔得㗎。”
他承认父母讚叶萱係好女仔，都好Like佢，仲不时催婚：“我同细佬成日扯猫尾，耍太极。”他又投降说：“畀返啲神秘感我，我老嘞，抵受唔住压力，放过我，畀我透吓气。”
