明报：曾参加TVB《功夫新星》 “腹肌IT男”谭坤伦入行13年 宣布离巢
曾参加TVB《功夫新星》﹑剧集《On Call 36小时II》﹑《果栏中的江湖大嫂》﹑《天命》﹑《包青天再起风云》和《爱‧回家之开心速递》等的男艺人谭坤伦，2011年加入无綫，在TVB打滚13年，今天（21日）他在社交平台宣布离巢，他还表示考虑3年才作出决定。
谭坤伦先写道：“TVB再见，首先要多谢搅（搞）出《功夫新星》呢个节目嘅所有人，令到我好衝动咁参加咗，从而进入咗呢个行业。过咗非常精彩嘅13年，训练班毕业之后，多谢监制潘嘉德先生，令我可以参与On call 36小时2、拆局专家、醋娘子、流氓皇帝、三个女人一个"因"。
然后要多谢庄伟健监制嘅信任，令到我可以参与《天命》呢套剧集，第一次有感情线，以及有机会展露我嘅三脚猫功夫。然后再多谢监制同埋导演嘅坚持之下，我先再有机会参与《包青天之再起风云》，虽然经历咗一个相当辛苦嘅拍摄过程，但令我得到非常难得嘅回忆。
可以参与两位金牌监制嘅剧集，真係会好开心，因为细个嘅时候，就睇过佢哋制作嘅《寻秦记》、《衝上云霄》。然后两位监制离开TVB之后，我经历咗好长时间嘅‘失业’，之后就要多谢监制陈耀全、方骏钊，俾我参与咗好多套剧集。
2018年多谢一位副导演，搵我做IT狗，其实好耐之前我就好想加入开心速递，呢套剧集帮左我好多，令到一个内向嘅我，慢慢打开自己，寻找演员嘅自我创作，然后得到观众嘅笑声，慢慢增加咗我嘅自信心。然后多谢珍姐（曾励珍），监制林建祥，俾咗更多演出机会我哋，亦都好多谢编剧知道我锺意健身，写咗个腹肌IT男出嚟，令到我终于终于有感情线，我对唔住Gigi（罗雪妍饰），要你再发掘下一个腹肌男。
仲要多谢TVB呢个大家庭，无论幕前幕后，未能一一多谢嘅人，你哋都会在我心中，能与你哋一齐捱更抵夜，日晒雨淋，好多精彩嘅回忆。多谢你哋嘅照顾，包容，教导，提携。
仲要多谢好多记者，估唔到当时为咗拍摄腹肌需要断食，会有咁多报道，令到我有咁多人留意到。多谢我嘅fans，你哋咁多年一直依然到场支持，实在荣幸！我依然会继续一直係呢个行业发展，欢迎大家揾我合作。各位江湖再见！”
