星岛：刘嘉玲遇91年《鸡鸭恋》幕后兴奋倾唔停 孖佘诗曼西贡半日游食尽驰名小店
58岁的刘嘉玲好忙，经常陪影帝老公梁朝伟出席全球影展及颁奖礼，Taylor Swift喺新加坡开演唱会又见到佢，又会出席上海的珠宝首饰活动，近月又忙拍摄内地节目《嘉人自友约》，好多网民已从多地野生捕获Do姐、薛凯琪及罗子溢夫妇等艺人做嘉宾。
上周五(22/3)下昼，戴住黑超一身型格Look的刘嘉玲同佘诗曼现身西贡拍节目，食匀驰名小店，前者路过旧墟一间餐厅，跟识于微时的电影幕后相认，嘉玲姐劲兴奋，先揽揽再用手机自拍，然后快速想当年，全程笑唔停，普通话夹杂广东话，更相约有机会再见面。採访:廖思慧
当日中午12时，刘嘉玲同佘诗曼连拍摄队伍近30人现身西贡，在旧墟行街时跟一间餐厅老闆相遇，老闆跟她打招呼，倾多两句就勾起嘉玲姐记忆，原来老闆以前是龙虎武师，嘉玲姐向镜头介绍他，还笑笑口上前轻推对方，“他是任达华的专用替身，看一下，像不像任达华。”搞到老闆怕丑大笑。
嘉玲姐笑住倾
老闆提到1991年的电影《鸡鸭恋》有份做华哥替身，觉得刘嘉玲唔会记得，女方即大声跟他说，“《鸡鸭恋》?我拍的电影，我怎麽会不记得。”老闆再提1991年拍摄的《子弹出租》，以老人家称呼华哥，嘉玲姐Feel唔到箇中含义，广东话回他，“佢嗰时都唔係老人家。”
之后再提到方中信有时也会帮衬其餐厅，嘉玲姐好惊讶，“方中信都住在西贡?”嘉玲姐全程答问好多表情，又手郁郁非常可爱，而阿佘及内地男主持就做观众，笑住听两人吹水。由于赶住拍摄，嘉玲姐要转场，老闆相约下次有机会再倾。
阿佘超好笑容
够钟食Lunch，两人转往食车仔麵，店主安排摄制队坐在店内最入的位置，食客见到身旁有明星光临都冇太大异样，又食又拍半小时完成，离开时阿佘面对街坊笑笑口讲Hello，街坊大讚《新闻女王》“Man姐”真人原来咁鬼Nice，而嘉玲姐负责埋单，还提店员记得包好外卖。
食完正餐个胃仲有少少位，两人再帮衬同属西贡名店的驰名菠萝包，店主安排两人坐在正门位置，阿佘仲戴住手套食菠萝油㖭。食饱最啱散吓步，网上有唔少游客拍到两人去码头睇海鲜，又去行沙滩及捉围棋，希望节目出街后，可以有助带旺西贡经济啦。
