星岛：冼靖峰 黄奕斌 文佐匡好识谂：笑你係帮紧你
LOONG 9无惧洗版式耻笑有负评当宣传
《声梦传奇》出身的25岁冼靖峰（Archie）、24岁黄奕斌（Hugo）及24岁文佐匡（Sean），以《亚洲超星团》前9名成绩，加入男团LOONG 9（玖珑少年）。团名一曝光即惹来海量负评，又突然加入3位新成员，连首个香港拍手签名会也未能顺利举行。3子在参赛时早已习惯面对抨击，更视负评为提升知名度捷径，对未来发展充满信心。
LOONG 9甫出道已一波三折，3月9日成军，3月28日突宣布加上张镐濂，郭殿甲和陈鑫昊，并分为LOONG 9-S和LOONG 9-V，而计划在4月28日于香港举办拍手签名会，又因不可抗力因素煞停活动。3子身经百战，Archie认为作为新人，面对不同声音是必经阶段，“最紧要识得衡量自己表演成点，睇你点样去消化。”
Archie似爹哋开解Sean
Archie觉得《声梦》由专业评审团队评核，《超星团》就由观众投票，所以后者更加考舞台下的表现，“舞台下面我哋所谓‘营业’，点样令观众更加锺意你，係几深嘅学问。”跳舞是他最大弱点，他坦认进步得慢，决赛仍冇信心跳得好，担心会累街坊，“学舞学两日，第3日全队人已经跳到成隻舞，我都只跳到3分1，仲有3分2未得。”
其他参赛者主动指导，是他最大收获，“唔係靠自己努力，係靠身边人愿意去帮我，玩呢个比赛最值得开心嘅嘢，一个solo歌手每次唱完，其他歌手唔会同你讲边度唱得唔好，但玩比赛就会有身边选手话畀你听。”
Sean排舞时因被换C位大发脾气踢枱发洩，事后虽有公开道歉，但负评依然不绝，他承认是一个大教训，“要多谢呢件事，係成长过程，后悔过错过，下次学识更加好去处理呢件事，令到观众见到我嘅成长。”他又多谢 Archie的耐心开解，“Archie似爹哋咁𠱁我，教我下次应该点做，帮咗我好多。”而参赛表现一直平稳的Hugo亦被批评，“觉得我太平均，所有嘢都做到，但冇嘢好突出。”他坦认批评是当头棒喝，“往往最真实嘅先令到自己去思考，好似会hurt到，但亦都鼓励自己进步，会醒一醒去面对自己。”
“妙音龙子”要求换名
讲到单是LOONG 9团名已惹来超多负评，3子认为对提升知名度反而有帮助，Archie说：“好老实讲人哋笑你，其实係帮紧你。”Sean说：“大家未必知入面嘅人，但起码知道呢个团。”他更搞笑话：“我想做‘龙五’或者‘龙九’，哈哈！好似型啲，‘龙九’嘅话我可以同人讲我係‘Kowloon’，依家係‘龙七’囉！”
Hugo更用玄学角度解释，“我同屋企人都好信风水，好多人讲‘LOONG 9’运势好好，就开始锺意呢个名，最重要个名有反响。”Archie认为团名只是名字，重点应放在表现上，“只要第1首歌好嘅话，大家会锺意会听，会继续睇我哋表演，呢个先係最紧要。”
至于各自的外号，Sean就好锺意叫“迅猛龙”，“喺《Jurassic World》佢係好聪明又讲义气，查过‘迅猛龙’係所有恐龙里面最聪明，我其实差好远，都希望真係做到。”Hugo对被封“翼龙”亦好满意，“呢种龙喺天空飞，好自由，我又好锺意蓝色，天空係蓝色我就更加锺意。”
而外号“妙音龙子”的Archie原来曾要求改名，“唔係唔满意，只係想团队统一啲，有畀龙字尾嘅名我拣，但就觉得个意思冇呢个咁中，依家一听个名就係同音乐有关，知道係Vocalist，就用返呢个。”
讲到未来目标，Hugo和Sean希望成为跳舞和Rap担当，而身为主唱担当的Archie，希望队员能发挥所长，令观众记得自己，“团队越多人，9个、12个，甚至15个人，会对每个人越嚟越模糊，希望过咗1年，我哋出咗几首歌，有唔同表演后，观众望住我哋都有独特一面，表现到每个人嘅特色。”
