钟嘉欣爆老公凌晨4点越洋睇骚：佢话我好Yummy
艺人锺嘉欣在TVB台庆颁奖礼失落“视后”，只夺得“马来西亚最喜爱TVB女主角”，节目后她到将军澳电视城门外与廿多位粉丝见面，粉丝对嘉欣说：“你永远都系我哋嘅最佳女主角！”又送上版纸牌“最佳女主角”，她与粉丝齐齐开香槟及合照，心情无损。
只夺得“安慰奖”的嘉欣被问到可失望？她大方说：“一啲都冇，好感恩可以参与颁奖礼，之前都讲都唔知几时再返嚟，可能未必会再上到呢个颁奖台，所以今日我已经准备好心情，入行咁多年，我真系好清楚，喺台上我其实已经估到，攞咗马来西亚个奖都讲唔知仲有冇机会上台。所有提名嘅人士都曾经系同事、亦系我嘅朋友。我拍剧咁耐知道要有稳定嘅位置系需要有好多付出，任何一个演员攞到奖都有佢哋嘅付出。”
嘉欣笑言觉得自己好“叻叻猪”：“边个攞都冇所谓，依家出席颁奖礼同细个好唔同，以前好紧张，好在乎奖项，做咗妈妈之后心脏好强大，亦睇得好远，颁奖台发生嘅事情好安然去接受，过程更加了解心灵，原来已经睇化咗颁奖礼嘅奖项，坐喺度真系可以enjoy the show，冇手汗、冇心跳加速，衷心祝福每位得奖者，戥佢哋高高兴，我觉得又长大咗一课。”
嘉欣讲到身在加拿大的老公即甜丝丝：“佢衰猪啦，佢专登凌晨4点起身𥄫电视，睇吓老婆靓唔靓先，佢话我好靓、好Yummy，但话我唔乖，好似眼瞓咁，因为好耐冇出席咁长嘅颁奖礼。”嘉欣指今次回港主要是处理私人事，收到公司邀请出席颁奖礼也考虑了一会，但想到粉丝和观众支持希望见到她出席，故今次是真心真意要多谢支持者，她说：“我会继续努力，可能我做得未够好，所以攞唔到，我要继续加油，可能几年或10年后有机会呢。”
胡鸿钧亦特意找嘉欣拍摄合照，并获她大赞似韩星池晟，指他唱歌、演戏也好好，前途无可限量。另外，马国明、李佳芯、姜丽文亦到电视城门外与粉丝开香槟庆祝攞奖。
