萧正楠唱情歌冧黄翠如变搞笑片：够钟食药喇
艺人萧正楠早排畀太太黄翠如大爆佢喺屋企收埋好多玩具之后，今次又有新搞作，佢之前喺社交网上载咗短片，攞住支结他自弹自唱郑伊健经典歌《甘心替代你》，又标签住“够钟食药”，当时好多网民都赞佢唱得好，太太黄翠如亦有留言问佢“第二个1分钟呢？”，事隔一日原来有下集，阿萧喺社交网公开第二条片段，片中佢唱埋《甘心替代你》最尾嗰两句，之后就讲：“人哋话10年磨一把刀，我就10日练一首歌，吹咩！”跟住就发傻大笑咁喺度乱弹，翠如就大头入埋镜，之后问老公：“咩事呀？有冇乜嘢帮到你吖？”，阿萧就答佢：“冇嘢呀，够钟食药啦！”然后两口子又喺度大笑，网民都畀佢两公婆引到哈哈大笑，有网民就留言：“终于知点解你要食药”、“系你要食药，定萧太要食？”、“两个都去食药啦！”亦有网民留言：“将来我都要搵一个好似萧太咁样嘅老婆”其实想开心真系可以好简单㗎。
