疑似限奶令打格仔 傅嘉莉新剧玩鬼影变幻球？
由影星张兆辉、吴卓羲及马国明等主演嘅邵氏剧集《飞虎之壮志英雄》依家喺内地平台播出，气势如虹大获好评，新剧唔只大玩社交网平台出力宣传，仲加入短片平台继续Sell剧，不过有眼利网友就发现，新剧出街版本虽然尺度同平时差不多，不过一去到短片平台就忽然见到疑似“限奶令”，多条片段就见到女艺人嘅事业线均打上格仔，“捽”走性感画面。
好似其中一幕傅嘉莉身穿低胸晚装现身，同郭晋安、梁竞徽和罗乐林等斗戏，当中佢就被“捽”走事业线，而陈滢喺另一条片就讲到佢同黄宗泽同床共枕，同样佢条事业线一样被遮，黄宗泽一身肌肉亦打咗格仔，未知系咪为迁就内地短片平台而“加工”。不过同时亦有短片见到傅嘉莉同一场低胸晚装剧情继续有得“留低”，而陈滢另一套中门大开短裙仔亦未有被后期制作打格。
