陶大宇被“大小姐”力邀 随时《爱．回家》！
艺人陶大宇因为翻唱一曲《倒转地球》已红遍内地，大家日日学佢跳水拨舞，最近佢返咗香港，即刻被“娘家”TVB《东张西望》捉住访问，毫无架子嘅佢就现身电视城，即引嚟多位曾合作嘅艺员好友上前揽揽兼集邮，人缘非常好！
访问一开始，陶大宇就被“视后阿妹”唐诗咏冲入镜头要求合照，原来二人早年曾合作剧集《心花放》演兄妹，唐诗咏见到佢就即刻上前揽到唔肯放手，成个小粉丝咁偈都唔倾，要合照咗先。之后“大小姐”林淑敏同“送水辉”许家杰路过，二人边跳边唱《倒转地球》夹击，搞到陶大宇都劲兴奋咁“左拥右抱”，又自爆当年得到林淑敏鼓励非常感动，更直言有睇开《爱．回家之开心速递》，连“大小姐”同“送水辉”结咗婚都知，难怪二人都要捉住佢，要佢答应客串《爱回家》，见陶大宇冇Say No，唔通嚟紧真系有机会见到佢现身？
《爱》剧监制林建祥接受东网访问，被问到会否邀请陶大宇客串演出，他说有留意陶大宇在《东》的访问，觉得不错及好得意，又说不排除合作：“我唔知大宇哥个期点，随缘啦！”
