连林子祥名都嗌唔出！落选港姐黄婉恩采访出丑遭叫停
落选港姐黄婉恩早前被指“食完松”走数，借KOL名义呃饮呃食，却没有兑现承诺于社交网出Post兼玩“消失”，令餐厅公关大为不满。虽然事件暂时告一段落，不过近日佢再惹是非，日前佢TVB娱乐新闻台记者身份采访《马时亨名人堂》节目录影探班，进行直播时竟错漏百出，连马时亨嘅名都嗌错，甚至叫唔出嘉宾林子祥嘅名，即被网民狠批唔专业！
片中黄婉恩向马时亨发问，指：“今日都想知道点解‘马善行’会邀请……”马时亨听到即反问：“马咩？”黄婉恩再更正，但都系继续叫错“马事行”，令对方即忍唔住表示：“咪咪咪，讲错名，你连名都讲错，哈哈哈。”黄婉恩就改口叫“马生”，马时亨就指：“你讲错名，所以一定要Cut咗再嚟过。”
岂料访问重新开始后，黄婉恩却叫唔出嘉宾林子祥嘅名字：“两位好，想知今日马生点解会邀请呀呀呀…特别嘉宾嚟嘅？”，之后问问题亦不断重复类似问题：“会唔会讲打波故事”、“会唔会分享大家嘅故事”、“会唔会回味以前嘅事”等，气氛相当尴。而去到普通话版访问时，黄婉恩继续出错，将“访问”讲成“访闷”、“有没有”讲成广东话“有冇”、“演唱会”讲成“烟呛会”等，连环失礼，惟片中未见佢向两位访问对象致歉。
