家族荣耀 | 于洋不留守效力30年TVB仍感激高层：曾励珍对我哋几好
73岁老戏骨于洋现正舒适地过半退休生活，拍剧集《家族荣耀》志在过日辰，闲时弄孙为乐，自得其乐。于洋在演艺行业打滚逾50年，见尽娱圈各种光怪陆离，而单是为TVB就效力了30年。回顾TVB生涯，于洋直认公司待他不薄，但始终到了要走的时候，他说：「曾励珍对我哋几好。今次约满走，佢哋唔出声，都知咩事。留唔住人，梗係佢哋公司行政问题。我又唔係睇佢两餐饭，几廿岁乜都见过哂，冇所谓。」
于洋透露，TVB每年给予他的人工加幅都有逾十多个百分比，算是相当善待他们这班老戏骨，「公司一路对我都Ok，唔Ok都唔会做咁耐，做生不如做熟。」不过于洋认为临走时人工已见顶。
此外，为了还骚，连像是《异搜店》一样没有对白的角色都要接拍，自己亦无意留守，他说：「可能公司认为，佢哋人工冇得再去啦。每一个阿头都知道人工可以去到边度，去到尽咗，咁咪算囉！公司签咁多套，就要交咁多骚畀佢。每个月签几个骚，就算唔啱都要塞畀你。接到唔好，佢就话你推。」
有见TVB近年被批剧集质素下降，于洋不是不心痛，但认为要先解决人才流失的问题，他直言：「剧本有啲乱咁嚟，角色太单薄。问题在于咁多年嚟都唔识留人囉！你又唔捨得畀人工。有啲叻嘅人、读过吓书，你畀唔起人工，又多嘢做，人哋咪走囉！」
要留住人才，于洋认为最起码要像《家族荣耀》一样，给演员合理待遇，他说：「TVB好大镬，成日冇觉好瞓。人哋起码出面有10小时畀你瞓，你够睡眠先得㗎嘛！起码有休息时间。人工都好过TVB好多，合理囉！又唔会压得你太犀利。拍《家族荣耀》係喺深圳拍，套房大过咩咁，人哋畀套房你，大到不得了。」
此外，他又建议应像当年TVB五虎将一样，有计划地捧红艺人，「有啲係又捧、唔係又捧做主角。係咪都捧，冇个计划去捧。以前五虎係有计划㗎嘛。而家呢个未熟，嗰批又嚟啦，咁咪个个都唔入脑囉！听啲师奶讲，佢哋嘅意见就最实在啦！」
