陈敏之好锺意一个人Shopping 43岁一身Pink行街
43岁的陈敏之(Sharon)虽然已届中年，但都跟得好贴，为争取曝光开YouTube频道，约艺人老友吹吓水，题目吸引时仲可以见报，最新有请嚟老友胡定欣讲感情，好多传媒都有转载。日前下午，着粉红色衫加帽嘅陈敏之独自喺又一城行街，买完童装再买饭糰，最后落埋超市，买到一袋二袋再揸车返归，一个人行街都可以好开心。採访:谭一致
之前TVB节目《识货2》安排艺人参加比赛，最终陈敏之以近42万元销售额成为总冠军，就知陈敏之把口有几劲，开YouTube真係啱晒佢，最新上架嘅有请嚟两届视后胡定欣大谈感情观，定欣直言自己太过理智成为感情嘅阻碍，仲话相比起事业再创高峰，佢情愿搵到「Mr. Right」。
忠实饭糰迷
当日下午，一身Pink，连口罩都係粉红的Sharon先去无印睇衫，见佢睇针织衫、家品同文具，又睇吓啲儿童游戏产品，再讲住电话睇童装，逗留半个钟，买咗啲小朋友外套仔。然后就去买咗两件饭糰，之前都影过佢专登去买饭糰，睇嚟佢好锺意食，铁粉嚟嘅。最后再去行超市买生果，拣咗唔太耐，最后买埋口罩，都係唔係第一次影到Sharon单拖去Shopping，其实一个人行街都几好，唔使等人，锺意行边就行边，买完嘢就行去停车场攞车离开。
