马德钟若交换人生想做太空人 《双生》…

马德钟若交换人生想做太空人 《双生》为入行最辛苦之作

TVB剧《双生陌生人》将由25集浓缩至20集播出,身为男主角的马德钟(马神)其实为剧集付出不少,他形容这是入行以来最辛苦之作,分饰两个男主角的同时,仲有大量对手戏及动作场面,令他工作量增加几倍,而现实中若可交换人生,他很想做个太空人,因连拍戏都难有机会演太空人。

採访:杜淑霞 摄影:沈健程

马神在《双生》分饰富贵律师「高收成」和失败小人物「巫祺男」,由于两个男主角戏份一样重,加上两个角色经常会同时间出现兼有身体接触,甚至会大打出手,所以拍摄时有一定难度,「因为要就位,啲位要啱晒,又要就镜头机器要啱晒,我演嘅时候又要替身,我要教咗佢点演同埋动作係点,自己又要记返教咗佢啲乜,我谂真係多两三倍工作量,只要两个人一齐出现都烦。」

辛苦到拍完冇记忆

入行近30年的马神,更形容这是入行以来最甘一次,「入行以嚟最辛苦嘅一个戏,比起我拍《飞虎》或者拍古装仲辛苦,因为时间长工作量大,同一个时间要演两个角色,要不停转装,个精神係好乱,乱到我都有啲忘记咗我拍过呢个戏,拍完后冇咗记忆,其实我呢个戏做过啲乜?可能太多嘢塞落个脑,同埋休息时间太少,每日得一、两个钟,有时情绪又上上落落,多谢监製好体谅我呢啲情绪畀我休息,好感恩碰到个好团队,其他演员会话『拍咗马神先佢要抖吓』,佢哋真係好好。」

剧中两个角色互调身份,若现实有机会畀马神尝试另一个人生,他会如何选择呢?起初他觉得好难谂,但想了一阵就话:「我想做太空人上太空,你睇吓我哋𠵱家中国太空人几骄傲,如果有得对调嘅话,唔係呢个真係冇乜可能做得到。」而且马神不希望只是太空旅游,要做些更加有意义的事,「我想为世界做啲嘢,太空边度有啲嘢维修吓上去帮手,太空真係好神秘!」当然演绎太空人也不错,但可惜机会不多,「演太空人机会真係细,尤其是香港演员,内地演员都有机会,有几何西片会搵你去演太空人,香港本身又唔会有太空人。」






Leave a Reply