星岛：柯炜林难忘同发哥齐做坏事 幸运拍住影帝影后演《别叫我”赌神”》
柯炜林（Will）最近频频孖住发哥周润发和袁咏仪（靓靓）为电影《别叫我赌神》宣传，戏中发哥和靓靓饰演 Will父母，有不少感情戏。Will形容是“幸运被选中嘅细路”，戏外一样得到两大前辈照顾，最难忘跟发哥戏外都好似“两仔爷”一样相处，瞒住发嫂愉愉做坏事。
採访：杜杜 摄影：朱伟彦 髮型: Oscar Ngan化妆: Tammy Au服装:ZEGNA
《别》片早在2018年拍摄，Will忆述试镜时他还是出道不久，当时亦未知发哥和靓靓饰演父母，当得知有机会跟两位前辈合作已相当兴奋，而得知“中奖”的一刻，更加开心到不懂反应，“我记得当时喺街，收到电话听完呆咗，跟住就眼湿湿，要行咗上山平复吓心情。”问他为何能成为“幸运被选中嘅细路”，他就尴尬话：“我一直都唔够胆问，不如你哋帮我问啦！”而日前发哥终在首映时透露，贪Will够傻而拣他。
难忘再跟智叔最后合作
由于电影中Will跟发哥有不少跑步戏份，开拍前两个月，发哥便隔日搵他一齐练跑，这段日子令他好难忘，“我哋练跑啲地方比较偏僻，我又冇车，所以发哥每次会嚟我屋企车我，之后又会带我食好嘢，最后再车我返屋企，我哋倾咗好多嘢，呢段日子好帮到我哋拍摄。”
发哥对Will爱护有加，戏里戏外更似父子般相处，Will最难忘一次是去食饭，“嗰间餐厅我哋成日去，发哥同我都好锺意食一款河粉，但发嫂嗰日冇点拣咗其他嘢，但发哥话想食，我就细细声和应‘係啦，我都想食’，于是发哥即刻叫咗碗一齐食，发嫂问返佢就解释话Will想食，我哋好似背住发嫂偷偷做坏事咁，哈哈！”
至于戏中妈咪靓靓，Will一样感激对方带入戏，“我哋有好多感情戏，我问佢可唔可以拍之前望住对方对眼一分钟，等我可以易啲投入感情，佢好好每次都帮我，仲会喺现场叫大家静静，话要同个仔培养感情。”
另外跟已病逝的智叔廖启智再合作，亦令Will好难忘，“我第一部戏《点五步》已经同智叔合作，隔咗咁耐唔知佢仲记唔记得我，智叔竟然主动埋嚟搭住我膊头喺我耳边嗌‘牛屎’（《点五步》中角色），有佢喺度我个心即刻定咗，后尾知佢离开真係好难接受。”
