星岛：何广沛劲嬲网民作故仔：你哋知啲咩啫 忍无可忍“上水”回应食人妻抹黑留言
何广沛在剧集《你好，我的大夫》演中医，由唔睇中医到拍摄后完全改观。讲到被爆跟女公关Sarah Miu（苗承诺）拍拖后，曾多度“上水”回应贱嘴网民，闹他食软饭係渣男，又放料抹黑朱晨丽，广沛自爆已被网民狙击大半年，认为有人居心不良，破坏他辛苦建立10年的正面形象，忍无可忍才以真身留言嘲笑，“我唔出声你就係咁讲！”坦认跟新欢有结婚打算的他提到“旧爱”朱晨丽两个态度，强硬地划清界线。
採访：杜杜 摄影：朱伟彦 场地:Velo Italian Bar & Grill
在《大夫》演中医博士“辜清劲”的广沛，以往较少接触中医，亦对针灸有恐惧，“拍完呢套剧改观咗，剧集带出嘅信息，就係希望大家重新认识中医。”最近他扭伤颈，都有搵剧集的顾问中医帮手，“𠵱家够胆嘞！呢个月都有做针灸，仲人生第1次拔罐𠻹！”入行10年才跟蔡思贝合作，广沛形容感觉非常之好，“始终佢好有经验，当然唔係讲佢老，佢係拍得密亦都拍得多，同佢开工就唔需要担心太多嘢，大家都係‘fit马’。”两人合演感情戏更加得心应手，“去到现场就做，唔使就住就住去到好尽。”
言论自由唔代表任意抹黑
广沛大方认恋女公关Sarah后惨被网民围攻，他称女友是圈外人较难承受这类压力，“每个人嘅接受能力都唔一样，呢个可能要靠我去开解或者去纾缓，顺其自然，只不过係1次性报导，唔会係持续性或者困扰性嘅影响，相信佢过一排会冇事，会越嚟越习惯。”
讲到网上的抹黑留言，广沛原来早在大半年前已获粉丝报料，初时还觉得几有趣，“佢哋柯南上身有啲真有啲假，真嘅咪讲囉，都post咗隻狗出嚟，但我唔需要同佢哋交待，佢哋冇得fact check，事实得我先知。”后来他决定“上水”回应，因情况越来越失控，“不厌其烦散播啲谣言或者佢哋认为啱嘅嘢，作咗好多故仔，我咪用啲好幽默嘅方法，‘你哋不如去TVB考编剧做编剧啦，你哋咁有创意’，佢哋喺每个相关新闻下面都留一样嘅抹黑留言，讲1次OK，但喺度带风向就唔係咁好。”他越讲越滚，认为这批网民另有目的，“每个人有言论自由，但係唔需要带风向係咁去唱，影响人哋嘅思想，煽风点火，居心唔係咁好，点解要逼人相信你嗰套呢！？”
广沛称抹黑的内容相当广泛，但又完全冇证据支持，“话我食软饭、一脚踏两船、食人妻啦！又喺网上起底式搵好多timeline相，真係得啖笑，啲相真係唔关我事，话係我隻手又话係我隻錶，你哋知啲咩啫，我唔出声你就係咁讲！”网民更屈他向传媒放料抺黑朱晨丽，“呢单你帮我澄清嘞！话我私底下报料畀传媒做新闻，我其中1个回应都话‘你边度有证据证明我放料畀传媒呢’，过去10年传媒都知我作风低调，专注工作，我做咩要无端端放料畀传媒呢？！你哋认识嘅何广沛都唔係咁嘅人！”
同朱晨丽咁多年都係同事
广沛最㷫有人企图破坏他的正面形象，“佢哋立心不良到一个点，见香港嘅传媒冇报导，话要发去等佢哋报导，想破坏我呢10年嚟默默建立嘅形象，描述到我係佢哋认为嗰种食软饭、渣男，喺内地有个词叫“海王”（即同时跟多人搞暧昧），将呢啲标籤摆落我度。”幸好他得到不少心水清的网民支持，“唔係熟识嘅fans，未见过嘅，喺我回应下面支持我。”
他又自问在圈中一直待人不薄，不明为何突然成为箭靶，“同我合作完都知我从来冇害人嘅心，无私奉献我知道或者我识嘅嘢，陈晓华或者郭柏妍喺访问都有讚过我，唔存在我係个差嘅人囉，明嘅人就继续明，唔明嘅人由得佢继续唔明，唔会多讲，会用行动去话畀你听，我係个点嘅人。”
对于有指去年跟朱晨丽分手后，再见不是朋友，问到广沛现在跟女方关係？他即划清界线，“同事囉！咁多年都係同事。”有指朱晨丽粉丝有份留言狙击他，他就认为不会影响两人关係，“网民有佢哋自己世界，唔影响同事之间。”
曾表示已35岁是时候谂结婚，他即甜笑回应：“以前就冇乜点谂，𠵱家就一步步向前行囉，你问我咪公开囉，你唔问我咪继续工作，我都唔知几时有答案。”
